«Қай тілде сөйлегім келсе, сол тілде сөйлеймін»: Қарасай ауданы әкімінің орынбасары дауға қалды

Қарасай аудандық әкімдігіне келген заңгер Мейірман Шекеев аудан әкімінің орынбасары Ақылбек Бексұлтанның қазақ тілінде жауап қайтармағанына наразы болды. Әкімнің орынбасары қай тілде сөйлегісі келсе, сол тілде сөйлейтінін айтады, деп хабарлайды Orda.kz.

Бейнежазба әлеуметтік желіде жарияланып, көптің ызасын тудырды. Онда заңгер Мейірман Шекеев жағдайды айтып жатып, «қазақша сөйлейік» дейді. Бұған Ақылбек Бексұлтан былай деп жауап береді:

«Қазақша сөйлей беріңіз. Мен міндетті емеспін. Қай тілде жауап бергім келеді, сол тілде жауап беремін», — дейді. 

Ақыры дауласып жүріп Мейірман Шекеев әкімге кіреді. Әкімге кіргенде осы қызметкерді жұмыстан шығару керегін айтады. Әкім болса: «орынбасарымның мәселесін өзім бөлек қараймын, жарай ма?» деді.

Заңгер Мейірман Шекеев әлеуметтік желіде былай деп жазды:

«Мемлекеттің қаражатына семірген мемлекеттік қызметкерлер, мемлекеттік тілде сөйлегісі келмесе, қаным басыма бір-ақ шығады. Қарасай ауданы әкімінің орынбасары Ақылбек Бексұлтан адам тұрмақ өзінің ана-тілін, одан қалса мемлекеттік қызметкер бола тұрса да ҚР мемлекеттік тілін менсінбейді екен. Алдына келген қазақтың сұрағына қазақ тілін білсе де, қазақша сөйлеуге арланып: «мен өзім білем, қай тілде сөйлейтінімді» деген менмендігі ұрып тұр. Одан қалса қол астындағыларға менің распорожениемді алып кел деп, елдің көзінше жұмсағанын қайтерсің. Құдды бір құл иеленуші сияқты», — деді Шекеев. 

Мейірман Шекеев сондай-ақ 11-бап бойынша мемлекеттік қызметкерлер келген адам қай тілде қызмет алуды өтінсе, сол тілде жауап беруге тиіс екенін еске салды.