Экс-судья Светлана Жолмановаға қатысты сот тағы кейінге қалдырылды

Алматы қаласы Медеу аудандық сотының бұрынғы судьясы Светлана Жолмановаға қатысты қылмыстық іс бойынша сот отырысы бесінші рет кейінге шегерілді. Аса ірі көлемде алаяқтық жасады деп айыпталған бұрынғы судья белгісіз себептермен сот отырысына келмеді, деп хабарлайды Orda.kz.

Алматы қаласының мамандандырылған ауданаралық әкімшілік сотының судьясы Қанат Арыновтың айтуынша, айыпталушы қамауда отырған тергеу изоляторына оның сотқа неге келмегенін сұрап, арнайы сауал жолдайды.

«Светлана Жолманованың сот отырысына неге келмегенін анықтау үшін мекемеге сұрау жолданады. Осыдан кейін сот тиісті шараларды қабылдау мәселесін қарайды. Келесі отырыс 18 сәуір күні сағат 10:00-де өтеді», — деді судья.

Прокурор бұл айыпталушының бесінші рет сотқа келмей тұрғанын атап өтті. Бұған дейін ҚР Бас прокуратурасы Жолманова ісінің сотқа жолданғанын хабарлаған болатын.

Тергеу деректеріне қарасақ, 2021 жылдан 2024 жылға дейінгі аралықта ол азаматтарға жылжымайтын мүлік сатып алуға және тендерлік жобаларға қатысуға көмектесемін деген желеумен алдап, сеніміне кіріп, 1 миллиард теңгеден астам қаражатты иемденген.

«Тергеу барысында 48 қылмыс бойынша эпизод анықталды. Тергеу аяқталғаннан кейін қылмыстық іс ҚР Қылмыстық кодексінің 190-бабы 4-бөлігі 2-тармағы (аса ірі көлемдегі алаяқтық) бойынша айыптау актісімен сотқа жолданды»,  деп мәлімдеген болатын бұған дейін Бас прокуратура.

Еске сала кетсек, Светлана Жолманова бұған дейін президент Қасым-Жомарт Тоқаевтан көмек сұраған еді.