Экс-министр Марат Бекетаевтың ісі сотқа келіп түсті

Жеке компанияның басшылығымен бірге бюджет қаражатын жымқырды деп айыпталған бұрынғы әділет министрі Марат Бекетаевтың ісі сотқа келіп түсті, деп хабарлайды Orda.kz. 

Антикор бұған дейін экс-министрдің ісіне қатысты тергеу аяқталғанын мәлімдеген. 

Сыбайлас жемқорлыққа қарсы іс-қимыл агенттігінің ресми өкілі Данияр Бекайдаров бұрынғы шенеуніктің ісі 3 наурыз күні сотқа жолданғанын айтты. 

Еске салайық, Марат Бекетаев келтірген шығын бір миллиард теңгеден асқан. Сондай-ақ ол 2023 жылы елден қашуға әрекет жасағанда ұсталды. Бекетаев министрлікті 2016-2022 жылдар аралығында басқарған. Ал 2022 жылы премьер-министрдің кеңесшісі қызметіне тағайындалған еді.

46 жастағы Марат Бекетаев Шымкент қаласының тумасы. Ол Қазақ мемлекеттік заң университетін тәмәмдады. Кейін Лондон экономика және саясат мектебінде халықаралық бизнес құқығы бойынша магистр дәрежесін алды.