«Ішек-қарынын ақтарды»: Алматыда кісі өліміне күдіктілер жазадан құтылуы мүмкін

Бір топ адам Алматының қақ ортасында бір жігітті өлтіріп, ішек-қарынын ақтарып кеткен. Марқұмның туысы қылмыскерлердің жазадан құтылып кетуіне прокуратура «көмек» көрсетіп жатқанын айтты, деп хабарлайды Orda.kz.

Қанды оқиға 2023 жылдың 25-нен 26 қарашаға қараған түні Алматы орталығындағы караоке-бардың маңында болған. Аяусыз өлтірілген Багаудин Озиевтің әпкесі прокуратура істі созып, бапты «кісі өлтіруден» «қорғану» бойынша қайта саралады деп айыптап отыр. Әйел қатты күйініп, бейнежазбамен мәлімдеме жасап, құқық қорғау органдарының әрекетсіздігі мен «прокурордың бассыздығын» жеткізді. 

Кісі қолынан қайтыс болған жігіттің әпкесіне қысым көрсетіліп, істің «өзін-өзі қорғау» ретінде қайта қаралғанын мәлімдеді.

«Бауырымды қала ортасында топ болып өлтіріп, ішін жарды. Енді іс қылмыскерді жауапкершіліктен босататындай бағытқа бұрылды», – деді ол.

Жәбірленуші тараптың айтуынша, күдікті Аким Задорожный бір жарым жылдан астам уақыт тергеуден жасырынған. Алайда кейін өзі келіп, мойындап хат жазған екен. Соған қарамастан, Медеу ауданының прокуратурасы оны қамауда екі айға отырғызбай, уақытша ұстау изоляторынан босатып жіберген.

Фото: qamqor.gov.kz

Әйелдің айтуынша, бұл жағдай қылмыстық кодекстің 99-бабы «Кісі өлтіруден» 112-бапқа — «Қажетті қорғану шегінен асып, ауыр зиян келтіру» ретінде қайта сараланғаннан кейін болған. Марқұмның туыстары бұл нұсқаны ақылға қонбайды деп санайды.

«Үш кішкентай қызы жетім қалған жалғыз адамға төртеуі жабылды. Бұл – өзін-өзі қорғау емес. Бұл – қылмыс. Біз әділдік талап етеміз», – дейді туысы.

Алматы прокуратурасының ресми түсініктемесінде бұл іс бойынша сотқа дейінгі тергеудің аяқталғаны расталды. Қазір тараптар іс материалдарымен танысып жатыр. Содан кейін іс заңдылықты бағалау және соттылықты айқындау үшін Медеу ауданы прокуратурасына жіберіледі. Прокуратура сондай-ақ арызданушының бұған дейін қабылданғанын және қазір қайтадан қабылдауға жазылғанын атап өтті.