ИРСК соққыны үдетті: Нысанаға АҚШ-тың серіктестері алынды

Парсы шығанағы мен Ормуз бұғазы аймағындағы АҚШ базалары, сондай-ақ басып алынған Палестина аумақтарындағы әскери күштердің шоғырланған орындары мен командалық орталықтары соққыға ұшырады, деп хабарлайды Orda.kz IRNA агенттігіне сілтеме жасап.

Бұл нысандар «Шынайы уәде 4» операциясының 99-толқыны барысында соққыға ұшыраған. 

Ислам революциясы сақшылары корпусы өткен соғыстарда қаза тапқан мұсылман, иудей және христиан қауымдарының шейіттеріне арнап, қарсы тараптың қылмыстарына және Ассалуйе мұнай-химия нысандарына жасалған шабуылдарға жауап ретінде бірлескен операция жүргізді.

Операция барысында баллистикалық және қанатты зымырандар, сондай-ақ соққы беретін ұшқышсыз ұшу аппараттары қолданылды. Парсы шығанағы мен Ормуз бұғазы аймағындағы АҚШ базаларына, сондай-ақ басып алынған Палестина аумақтарындағы әскери күштердің шоғырланған орындары мен командалық орталықтарына соққы жасалды.

Шабуылдың алғашқы кезеңінде Сауд Арабиясының Әл-Джубайль ауданында орналасқан америкалық Sadra, Exxon Mobil және Dow Chemical компанияларына тиесілі ірі мұнай-химия кешені, сондай-ақ Әл-Джуаима ауданындағы Chevron Phillips компаниясының ірі мұнай-химия кешені нысанаға алынды.

Сондай-ақ, Хор-Факкан (БАӘ) порты арқылы Израильге тиесілі әскери жабдық тасымалдаған контейнерлік кеме барлау-соққы операциясы барысында жойылғаны хабарланды. Бұл әрекет Израиль және АҚШ-пен ынтымақтасатын барлық кемелерге ескерту ретінде жасалды.

Айта кетейік, бүгін ғана ИРСК АҚШ пен оның серіктестерінің инфрақұрылымына соққы жасап, оларды жылдар бойы аймақтың мұнай мен газынан айыратынын мәлімдеген еді. 

Оқи отырыңыз: 

• Трамп Иран өркениеті «жойылуы» мүмкін екенін тағы мәлімдеді
• Такер Карлсон: «Сен кімсің, Трамп? Өзіңді Құдаймын деп ойлайсың ба?»