Иранда әуе таксиі іске қосылды

Иранда елдегі алғашқы әуе таксиі ресми түрде іске қосылды, деп хабарлайды Orda.kz агенттігі IRNA-ға сілтеме жасап.

Салтанатты рәсімге Президент бейнеүндеу арқылы қатысып, құттықтау сөзін жолдады.

Алғашқы әуе такси рейсі Кередж және Казвин қалаларын байланыстырып, тұрақты тасымалдардың басталғанын білдірді.

«Әуе таксиінің іске қосылғаны – бұл үлкен мүмкіндіктерге жол ашатын маңызды жетістік», – деді Паям Ерекше экономикалық аймағы мен халықаралық әуежайының бас директоры және министр кеңесшісі Мохсен Хасанлу. 

Оның айтуынша, бұл жаңа көлік түрі Паям Ерекше экономикалық аймағына инвестиция тартуға, ұлттық экономиканы ынталандыруға және Альборз провинциясының дамуына ықпал етеді. Сонымен қатар, бұл халықтың авиациялық қызметтерді кеңінен пайдалануына қолайлы жағдай жасайды.

«Әуе таксиінің іске қосылуы аз жүктелген әуе бағыттарын жандандыруда маңызды рөл атқарады», – деп атап өтті Хасанлу. 

Ол бұл «инновациялық қызмет түрі халыққа әуе көлігін пайдалануға мүмкіндік беріп, инвесторлар үшін жаңа инвестициялық мүмкіндіктер туғызады», – деді.

Ирандағы алғашқы әуе таксиінің іске қосылуы елдің көлік инфрақұрылымын жаңғырту және авиациялық қызметтердің қолжетімділігін арттыру жолындағы маңызды қадам ретінде бағаланды.

Былтыр АҚШ-тың Федералдық авиация әкімшілігі (FAA) әуе такси ұшқыштарының жұмыс істеуіне рұқсат беру ережелерін жариялады. Бұл әуе таксилері алғашқы тікұшақтар пайда болған 1940 жылдардан бері азаматтық ұшақтардың алғашқы жаңа санатына айналатынын білдіреді.

Биыл сәуір айында Қытайда алғаш рет ұшқышсыз ұшатын такси пайдалануға берілді.