«Хутор басшысы» Талғар әкімдігіндегі лауазымынан айырылды

Талғар ауданы әкімі аппаратының басшысы Аслан Қасымбаев қызметінен босатылды, деп хабарлайды Orda.kz. 

Сонымен қатар Талғар ауданының әкімі Таңат Айдарбеков пен оның орынбасары Айбек Бидаев сөгіс түріндегі тәртіптік жауапкершілікке тартылды. 

Аслан Қасымбаевтың Талғар ауданы әкімі аппаратының басшысы болып отырғанына екі жылдан асқан. Оған дейін ол Талғар ауданының Белбұлақ ауылдық округінің әкімі болып жұмыс істеген. 

Талғар тұрғындары кісі қолынан қаза тапқан Шерзат Болаттың өліміне «Хуторлықтар» деп аталатын қылмыстық топтың қатысы бар деп отыр. Ал бұл топты ағайынды Хасан, Аслан және Ержан Қасымбаевтар басқарады деген қауесет бар. Тергеу әлі жалғасып жатқанымен, полиция мұндай топтың барын жоққа шығарды.

Айта кету керек, ресми сот кабинеті дерегінше Аслан Қасымбаевтың тағы бір бауыры Ержан Нұрғайыпұлы Қасымбаев «адам өлтіру» бабы бойынша істі болған. Ол кеден қызметкері Медет Жамашевты қасақана өлтірді деп айыпталған.  

Еске салайық, бұған дейін Аслан Қасымбаевтың інісі Хасан Қасымбаев Orda.kz тілшісіне сұхбат бергенін хабарлаған едік.