Хромтау қаласының әкімі пара алды деген күдікпен қамауға алынды

Ақтөбе облысында Хромтау қаласының әкімі Cағындық Шабықбаев пара алды деген айыппен ұсталды. Шенді сот санкциясымен екі айға қамауға алынды. Қазіргі уақытта ол уақытша ұстау изоляторында отыр, деп хабарлайды Orda.kz. 

Ақтөбе облысы сотының баспасөз қызметі Қылмыстық кодекстің 366-бабы «пара алу» айыбы бойынша тергеу жүріп жатқан іске қатысты санкция берілгенін растады. 

Бейресми деректерге сәйкес, әкімнің жемқорлық әрекеті мердігер компаниямен арадағы келісімге байланысты болған.

40 жастағы Cағындық Шабықбаев бұл қызметке 2023 жылдың қыркүйегінде тағайындалған. Ол 1985 жылы 24 шілдеде Қостанай облысы, Қамысты ауданы Қамысты ауылында дүниеге келген.

• Еңбек жолын 2008 жылы «Ақтөбе облысының ХҚКО» РМК Әйтеке би аудандық филиалының басшысы болып бастаған. 
• 2016-2017 жылдары «Әйтеке би ауданы әкімі аппараты» ММ мемлекеттік қызметтерді көрсету мәселелерін үйлестіру бөлімінің бастығы болды.
• 2017-2018 жылдары «Хромтау ауданы әкімі аппараты» ММ мемлекеттік қызметтерді көрсету мәселелерін үйлестіру бөлімінің бастығы болған.

Авторы: Ардақ Ерубаева