Хасан Қасымбаевтың соты: Сот отырысына үш күдікті келмеді

Алматы облысы Талғар аудандық сотында Хасан Қасымбаев және тағы басқа күдіктілерге қатысты сот отырысы өтіп жатыр. Кезекті сот отырысына үш күдікті ауырып қалған соң келмеді, деп хабарлайды Orda.kz.

Талғардағы 16 жастағы Шерзат Полаттың өліміне қатысты қылмыстық іс — былтырдан бері Қазақстандағы ең атышулы іс болды. Осы қазадан кейін Талғарды «хуторлық» атты қылмыстық топтың қорқынышта ұстайтыны жайлы гу-гу әңгіме тарады. Бүгін Алматы облысы Талғар қаласында Шерзат ісінде жұрт «хуторлық» топтың «басшысы» деп атап кеткен Хасан Қасымбаев пен серіктернің соты өтті. 

Сонымен қатар бүгінгі сот отырысында жаңа прокурор келді. Жергілікті қызметкерлердің айтуынша бұрынғы прокурор іссапарға кеткен екен. 

22 қыркүйек сағат 10:00-ге қойылған сот отырысы сағат 14:40-та басталды. Үш айыпталушы ауырып қалған соң осылай кеш басталды. Осылайша Қалымжанов, Ақтанов және Сұлтанбеков есімді күдіктілер сотқа қатыспады.

Айта кетейік, өткен сот отырысына келмей қалған екі жәбірленушінің бірі — Аюпжан Тәжиев осы жолы сот отырысына келді. 

Еске сала кетсек, судья Айнагүл Түкібаева  жәбірленушілер мен куәгерлердің айғағын баспасөз бетінде жариялауға тыйым салды. Ал сот залына кіре алмаған БАҚ өкілдері сот отырысын көрші бөлмеден экран арқылы көрді. 

Айта кетейік, 2024 жылдың 2 қарашасында Хасан Қасымбаев уақытша ұстау изоляторына қамалды. Ол 2021 жылы ережесіз жекпе-жектен жаттықтырушы Арман Әлімовтің денсаулығына қасақана ауыр зиян келтірді және ұрлады деген күдікке ілінген.