«Халықаралық дау»: Қазақстан билігі белсендінің тағдырын 12 қыркүйекте шешпек

Алматы полиция департаменті ұстап отырған қарақалпақ белсендісі Ақылбек Мұратовқа (Ақылбек Мұратбай) 12 қыркүйекте босқын мәртебесін беру мәселесі бойынша Комиссияның маңызды отырысы өтеді, деп хабарлады Orda.kz.

Мемлекетаралық іздеуде жүрген Өзбекстан елінің азаматы Ақылбек Мұратовқа Өзбекстан елі сұрау салып жатыр.

Еске сала кетейік, Ақылбек 2024 жылдың 15 ақпанынан бері Алматының тергеу абақтысында отыр. Ол YouTube арнасында құқық қорғаушы конференциясынан бейне үзінділерін жариялаған болатын.

Сондай-ақ, Өзбекстан билігі оны Қарақалпақстандағы наразылықтар кезінде қаза тапқандарға арналған бейбіт флешмоб өткізгені үшін экстрадициялауды сұрап отыр.

Оның  Х желісінде жазылған жазбада сот онлайн нұсқада өтетіні жазылыпты. Ал тергеу орнындағы интернет желісі нашар.

«Мұратбаевқа отырысты офлайн режимінде өткізуге рұқсат берілген жоқ. Тек бейнеконференция арқылы қатыса алады, ал тергеу абақтысындағы интернет байланысының сапасы өте нашар»,  делінген жазбада. 

Белсендіге «босқын» мәртебесі берілмесе, Алматының тергеу абақтысынан Өзбекстанға жіберілуі мүмкін.

Өзбекстан құрамындағы Қарақалпақстан елінде 2022 жылы шілдедегі қақтығыстан кейін Қазақстандағы қарақалпақ белсенділері қысымға шағымданған болатын. 

2022 жылы күзде Orda.kz  белсендінің ұсталғаны жайлы жазған болатын. Сол кезде бірнеше қарақалпақ белсендісі құқық қорғаушылардың айтуынша, Өзбекстан билігінің сұрауымен Қазақстанда ұсталыпты. Қазақстан олардың босқын мәртебесін беру туралы өтініштерін мақұлдамады.

Бір жыл қамаудан кейін олар 2023 жылы күзде босап шықты. Алайда құқық қорғаушылар Өзбекстан билігінің сұрауы әлі күшінде екенін, оларды экстрадициялауы мүмкін деп қауіптенеді. Бұған дейін халықаралық құқық қорғау ұйымдары ресми Астананы белсенділерді елдеріне қайтармауға үндеп, олардың өміріне қауіп төнуі мүмкін екенін айтқан.