Алматыда өзбек полициясы қарақалпақстандық белсенділерді ұстады

Алматыда өзбекстандық полицейлер қарақалпақстандық екі белсендіні ұстады.

Бұл туралы Алматыдағы қарақалпақ диаспорасының белсенді мүшесі Ақылбек Мұратбай хабарлады.

Қазақстанға келген Өзбекстан ішкі істер министрлігінің қызметкерлері Алматыда қарақалпақ диаспорасының белсенділерін ұстады. Олар 159-бап: Өзбекстан Республикасының конституциялық құрылысына қол сұғушылық және 244/1-бап бойынша қоғамдық қауіпсіздік пен қоғамдық тәртіпке қатер төндіретін материалдарды дайындау, тарату және көрсету деп айыптады.

Қазіргі уақытта екі адамның қамауға алынғаны белгілі:

• Қошқарбай Төремұратов

• Жангелді Жақсымбетов

Қошқарбай Төремұратовтың жұбайының айтуынша, оларды Қазақстаннан Өзбекстанға алып кетеді. Бұл қамауға алулар шілде айында Қарақалпақстанда болған наразылықтарға байланысты қарақалпақ белсенділеріне қарсы жүргізіліп жатқан қудалау шараларының бір бөлігі.

Еске салсақ, Өзбекстан құрамына кіретін Қарақалпақстанда 1 шілдеде ресми Ташкенттің Конституцияға өзгертулер енгізу арқылы автономия құқығын, өз тәуелсіздігін жариялау құқығын алып тастау жоспарына байланысты жаппай наразылықтар басталды.

Өзбек билігі шеруге шыққандарды қылмыскер деп, ал олардың әрекетін заңсыз деп жариялады. Қарақалпақстаннан ақпарат өте аз келеді. Бұқаралық ақпарат құралдарының хабарлауынша, аймақта байланыс проблемалары бар. Наразылық басылғаны туралы да ақпарат бар. 2 шілдеде Өзбекстан Қазақстанмен шекарадағы Қарақалпақстандағы өткізу пунктін жапты.