«Халық көтерілді»: Корея президентіне қарсы митинг өтіп жатыр

Оңтүстік Корея президенті 3 желтоқсанда әскери төтенше жағдай енгізген болатын. Алайда 190 депутат бұл шешімге қарсы дауыс беріп, 6 сағатқа жетпей оны алып тастауға мәжбүр болды. Мыңдаған халық Сеулде алаңға шығып, импичмент талап етіп жатыр, деп хабарлайды Orda.kz Yonhap ақпараттық агенттігіне сілтеме жасап.

Оппозиция оны «мемлекетке опасыздық жасады» деп айыптады. Артынша прокуратура да «мемлекетке опасыздық жасады» және «билікті асыра пайдаланды» деген айып тағып, күдікті ретінде санап отыр. Юн Сок Ёльдің елден кетуіне тыйым салынды. 

Оңтүстік Корея парламенті 7 желтоқсанда президентке импичмент жариялау мәселесін көтерді, бірақ биліктегі «Халық күші» партиясының депутаттары дауыс беруге бойкот жариялауына байланысты импичмент бойынша құжат қабылданбады.

Алайда Сеулде парламенттің алына мыңдаған адам шығып импичментті талап етіп жатыр.

Жиналған жұрт ұялы телефондарымен және басқа да құралдармен жарық жағып, өз наразылықтарын көрсетіп жатыр. Yonhap ақпаратына қарасақ, 4000-дай ереуілші, 2000-дай полицей қызметкерлері қатысқан шеру фестиваль секілді әншілердің қатысумен бейбіт өтіп жатыр. Митинг бір апта бойы болмақ. 

Президентті құлатуға ұмтылған партия жетекшілері жайлы және Оңтүстік Кореядағы саяси тұрақсыздықтың Қазақстанға әсері жайлы мына материалдан оқыңыздар.