Гүлмира Сатыбалдыны 12 жылға бас бостандығынан айырды

Мамандандырылған ауданаралық қылмыстық істер жөніндегі сотта Гүлмира Сатыбалдыны 12 жылға бас бостандығынан айыру үкімі шықты. Ал оның жүргізушісі Мәди Батыршаевты 9 жылға бас бостандығынан айырды.

Бұл туралы Orda.kz тілшісі хабарлады.

Қайрат Сатыбалдының бұрынғы әйелі «Заңсыз бас бостандығынан айыру», «Қорқытып тартып алу» және «Өзінше билік ету» баптары бойынша кінәлі деп танылды. Сот жиынтығында Гүлмира Сатыбалдыны орташа қауіпсіздік мекемелерінде 12 жылға бас бостандығынан айыру туралы үкім шығарды.

Айыпталушы Мәди Батыршаев Гүлмира Сатыбалдының нұсқауымен Жүнісовті еркін жүріп-тұруына, бостандығына кедергі келтіргені үшін айыпталды. Нәтижесінде Сот Батыршаевты Қылмыстық кодекстің 126-бабы «Заңсыз бас бостандығынан айыру» бойынша кінәлі деп танып, 9 жылға бас бостандығынан айыру туралы үкім шығарды.

Сондай-ақ судья жәбірленушілердің азаматтық талаптарын ішінара қанағаттандырып, Гүлмира Сатыбалдыдан 2, 6 млрд теңге материалдық шығын мен 10 миллион теңге моральдық шығын өндіру туралы шешім қабылдады. Ал Мәди Батыршаевты жәбірленушіге 2 миллион теңге моральдық шығын өтеуге міндеттеді.

Еске сала кетейік, бұған дейін прокурор Гүлмира Сатыбалдыға 13 жылға бас бостандығынан айыруды ұсынған болатын.