«Гүлмира Сатыбалды соңғы сөзден бас тартты»: Судья үкім шығару үшін кеңесу бөлмесіне кетті

Гүлмира Сатыбалды мен оның жүргізушісі Мәди Батыршаевқа қатысты сот процесі бүгін аяқталды. Сотта Қайрат Сатыбалдының бұрынғы жұбайы соңғы сөз сөйлеуден бас тартты. Судья Маратбек Кәкімжанов үкім шығару үшін ертеңге дейін кеңесу бөлмесіне кетті.

Бұл туралы Orda.kz тілшісі хабарлады.

Бүгінгі сот отырысы бастала сала айыпталушы Гүлмира Сатыбалды денсаулығына байланысты сот процесіне кезекті рет қатыса алмайтынын, тіпті соңғы сөз сөйлеуден де бас тартатынын айтты. Айта кетейік, 26 тамыздан бастап Гүлмира Сатыбалды бүйрек ауруымен қатар аллергиясының өршіп кеткеніне шағымданған болатын.

«Мен адвокат Данилованы толық қолдаймын және сот отырысын ары қарай менсіз жалғастыруды сұраймын», — деп қысқа қайырды Гүлмира Сатыбалды.

Сонымен қатар, сотта Гүлмира Сатыбалдының қызы Аружан Қайрат сөз алып Абай Жүнісов ауруханада жатыр деген қорғаушы Рашид Теңізбаевтың сөзі шындыққа жанаспайтынын айтты.

«Бір жарым ай бойы Абай Жүнісов сот процесіне қатыспады. Денсаулығына байланысты ауруханада жатыр деген сөз жалған. Мен оны Астана қаласындағы қымбат ресторандардың біріне кіріп бара жатқанын өз көзіммен көрдім»,— деді Сатыбалдының қызы.

Айта кетейік, жәбірленуші Аружан Қайратқа туыстық қатысы бар, Абай Жүнісов Гүлмира Сатыбалдының кіші сіңілсі Рая Пірімбетовамен некеде болған.

Сондай-ақ, айыпталушы Мәди Батыршаев соңғы сөзінде 2015 жылдан бері Гүлмира Сатыбалдымен жұмыс істегенін, оның ешқандай қылмысқа апаратын бұйрықтар бермегенін айтты.

«Құрметті судья, мен ағайынды Жүнісовтерді жақсы танимын, өмірде араласқанмын. Олардың шынай бет-бейнесін мен жақсы білемін. Абай Жүнісовке қарсы мен ешқашан физикалық, не моральдық қысым көрсетпегенімді тағы да айтамын. Оның бәрі сотта толық дәлелденбеді. Менің кәмелеттік жасқа толмаған балаларым бар. Жұмыссыз отырған әйелім, зейнет жасындағы анам бар. Ақ-қарасын ашып, мені ақтауыңызды сұраймын», —  деді Батыршаев.

Судья соңғы сөзден соң үкім шығару үшін ертеңге дейін кеңесу бөлмесіне кетті.

Экс-президент Нұрсұлтан Назарбаевтың немере інісі Қайрат Сатыбалдының бұрынғы жұбайына қатысты сот отырысы жарыссөзінде қандай тың мәліметтер айтылғанын Orda.kz тілшісінің репортажынан оқи аласыздар.