Грузияда президент сайлауы өтетін күн белгілі болды

Грузияда оппозиция даулаған сайлаудан кейін парламенттің алғашқы отырысы өткен болатын. Енді президент сайлауы 14 желтоқсанда парламент ғимаратында, ал инаугурациясы 29 желтоқсанда өтпек, деп хабарлайды Orda.kz «Азаттық радиосына» сілтеме жасап.

Бұған дейін өткен парламент отырысына Грузия президенті Саломе Зурабишвили сессияға қатысқан жоқ. Ол заң шығарушы органның қазіргі құрамын «конституциялық емес» және «заңсыз» деп санайды, Зурабишвили 26 қазандағы дауыс берудің ресми қорытындысы «толық бұрмаланған» деп біледі. Оппозициялық коалиция жетекшілері парламент отырысына бойкот жариялады.

Миллиардер Бидзина Иванишвили негізін қалаған, билікте отырған «Грузин арманы» партиясының 89 депутаты бірден дауысқа салып, барлық 150 депутаттың өкілетін мойындап, Шалва Папуашвилиді спикер етіп қайта сайлады. 

25 қарашада «Грузин арманы» партиясының депутаттары, Бидзина Иванишвили парламент ғимаратына күзетпен кірді. Мыңдаған оппозиция белсендісі ғимаратты толық жауып тастай алмаса да, оны үш жағынан қоршап, депутаттардың артынан «орыстар», «Путиннің құлдары» деп айқайлады.

 Батыс елдерінің көбі Грузия билігін сайлаудың аяқталғанымен және жаңа парламент жасақталғанымен құттықтауға әлі асықпай отыр.

Грузия парламентінің спикері Шалва Папуашвилидің айтуынша, президент өкілетінің мерзімі алты жыл емес, бес жыл болуы үшін сайлау мен инаугурацияның биыл өткені маңызды.

Бұған дейін «Мтавари» оппозициялық арнасы Грузия президенттігіне «Грузин арманының» төрағасы Ираклий Гарибашвили мен елдің бірінші президенті Звиад Гамсахурдияның ұлы Константин Гамсахурдияның кандидатурасы қарастырылып жатыр деп хабарлаған. Алайда билікте отырған партия жетекшілерінің бірі мұны жоққа шығарды.

Грузия президентін алғаш рет халық емес, сайлаушылар алқасы таңдайды. Алқа құрамына 300 адам кіреді, оның ішінде Грузия парламентінің 150 депутаты, Аджария мен Абхазия автономиялық республикасы жоғарғы кеңестерінің мүшелері бар.

Еске сала кетсек, Orda.kz бұған дейін болған Грузин халқының «Ресейлік партия керек емес» деп президенті Саломе Зурабишвилимен бірге митингіге шыққаны жайлы жазған болатын.