Ғалымдар АИТВ-ның алдын алуға арналған жаңа препарат әзірледі

АҚШ-тың Азық-түлік пен дәрілік заттар сапасын санитарлық бақылау басқармасы АИТВ инфекциясының алдын алуға арналған жаңа «Ленакапавир» препаратын ресми түрде мақұлдады, деп хабарлайды Orda.kz.        

Клиникалық зерттеулер нәтижесіне сәйкес, оның тиімділігі 99%-ға дейін жетеді.

Дәрі жасөспірімдер мен ересектерге арналған және вирустың генетикалық материалын қорғайтын әрі оның жасушаға енуін қамтамасыз ететін капсид ақуызының ыдырауын тежейтін ингибитор болып табылады.

Truvada және Descovy сияқты қолданыстағы алдын алу препараттары кері транскриптаза ферментіне әсер етсе, «Ленакапавир» тікелей капсидті бөгеп, жұқтыруды бастапқы кезеңде тоқтатады.

Дегенмен, мамандар препараттың ауру жұқтырған науқастарды емдеуге арналмағанын айтады. Соған қарамастан, бұл жаңалық болашақта АИТВ-ны емдеуге арналған ұқсас дәрілерді жасауға жол ашады.

Препарат Sunlenca сауда атауымен шығарылады. Жылдық курс құны 28 218 АҚШ доллары, бұл оны алдын алу құралдарының ішіндегі ең қымбаттарының біріне айналдырып тұр.

Сонымен қатар өндіруші компания АИТВ кең таралған Африка, Оңтүстік-Шығыс Азия және Кариб өңіріндегі 120 кедей елде арзанырақ балама дәрілерді өндіруге рұқсат беруге дайын екенін мәлімдеді.

Оқи отырыңыз:

• Желіде АИТВ індетін жұқтырғандардың тізімі шықты: Алматы полициясы тексеріп жатыр
• Қызылордада донор қаны құйылған әйелден АИТВ анықталды: ДСМ пікір білдірді