Футболды дамыту мәселесіне тоқталды: Тоқаев Халықаралық падел федерациясының басшыларымен кездесті

Қасым-Жомарт Тоқаев Халықаралық падел федерациясының (FIP) президенті Луиджи Карраро және Premier Padel кәсіби турының төрағасы Нассер Бен Ганим Әл-Хелаифимен кездесті, деп хабарлайды Orda.kz. 

Кездесу кезінде Қазақстанда падел спортын дамыту мүмкіндіктері талқыланды. Қазір елімізде 1,5 мыңнан астам ойыншыны біріктіретін қауымдастық жұмыс істейді және 16 облыста өңірлік федерациялар құрылған. Тоқаев мемлекет бұқаралық спортты дамыту мен заманауи спорт инфрақұрылымын қалыптастыруға ерекше көңіл бөліп отырғанын атап өтті.

Қазіргі кезде елімізде падел ойынына арналған 17 корт бар екен. 

Мемлекет басшысының айтуынша, 2027 жылы Алматы қаласында халықаралық талаптарға сай келетін, 10 корты бар ADD PADEL ARENA спорт кешенін ашу жоспарланып отыр. Сондай-ақ, Президент футболды дамыту мәселесіне де тоқталды. Ол Қазақстанда футбол клубтарын жекешелендіру және бәсекелі орта қалыптастыру бағытында жұмыс жүргізіліп жатқанын айтты.

Сонымен қатар, Мемлекет басшысы УЕФА Атқарушы комитетінің мүшесі әрі «Пари Сен-Жермен» клубының акционері Нассер Әл-Хелаифиге футболды дамытуға қосқан үлесі үшін алғыс білдірді.

Айта кетейік, президент Қасым-Жомарт Тоқаев 11-12 қарашада Ресей Федерациясына мемлекеттік сапармен барады.