Еуропадағы рекордтық ыстық Швейцария мұздықтарын ерітіп жатыр

Еуропадағы рекордтық аптап ыстық Швейцария аумағындағы мұздықтардың күрт ерітіп жатыр. Ғалымдардың мәліметінше, биыл жаз басында-ақ мұздықтардағы қар әдеттегіден бірнеше апта бұрын еріп кеткен, деп хабарлайды Orda.kz.       

Reuters агенттігіне сілтеме жасаған зерттеушілердің дерегіне сәйкес, бақылау нүктелерінің бірінде небәрі екі апта ішінде мұз қалыңдығы шамамен 1,5 метрге азайған. Бұл — климаттық өзгерістердің қаншалықты жылдам жүріп жатқанын көрсететін алаңдатарлық көрсеткіш.

Маусым айындағы аптап ыстық толқыны кезінде Швейцариядағы мұздықтар өте көп көлемде су жоғалтқан. Ғалымдардың айтуынша, еріген судың мөлшері соншалық, оны әр 6 секунд сайын бір олимпиадалық бассейнді толтыруға жетеді екен.

Мұндай жоғары температура Альпі таулары аймағында жиілеп келеді. Бұл өңір — Еуропадағы ең ірі мұздықтар шоғырланған аймақтардың бірі саналады.

Соңғы жылдары Швейцария мұздықтарының көлемі де қарқынды түрде қысқарып жатыр. 2000 жылдан бері мұздықтардың жалпы көлемі айтарлықтай азайған. 2022–2023 жылдары ең үлкен еру тіркелген.

Тіпті кейбір кіші мұздықтар толықтай жойылып кету қаупіне тап болған. Зерттеушілердің пікірінше, қазіргі қарқын сақталса, ғасыр соңына дейін Швейцариядағы мұздықтардың басым бөлігі жойылып кетуі мүмкін.

Мұздықтардың жедел еруі бірнеше маңызды мәселелерге әкеледі. Мұздықтар көптеген өзендердің негізгі көзі екенін ескерсек –  бұл су ресурстарының азаю қаупін тудырады. Кенеттен еріген мұз сел мен су тасқыны сияқты қауіпті жағдайлар туғызуы мүмкін. Оған қоса экожүйеге әсер етіп,  таулы аймақтардағы флора мен фауна өзгереді.

Ең бастысы туризмнен келетін қаражат азайып, ел экономикасына әсер етеді, себебі мұздықтар Швейцария туризмінің маңызды бөлігі.
 
Ғалымдар бұл құбылысты климаттың өзгеруі мен жаһандық жылынудың тікелей салдары деп есептейді. Атмосферадағы температураның көтерілуі мұздықтардың табиғи қалпына келуіне мүмкіндік бермей отыр.

Олардың айтуынша, қазіргі жағдай тек Швейцарияға ғана емес, әлемнің басқа да тау жүйелеріне тән. Сондықтан бұл мәселе жаһандық деңгейде қарастырылуы тиіс.

Швейцариядағы мұздықтардың жедел еруі — климат өзгерісінің айқын дәлелі. Рекордтық аптап ыстық табиғи тепе-теңдікке үлкен қауіп төндіріп отыр. Егер мұндай үрдіс жалғаса берсе, болашақта су ресурстары мен экологиялық тұрақтылыққа қатысты күрделі мәселе туындауы мүмкін.

Оқи отырыңыз:

• Еуропада аптап ыстықтан бағдаршамдар еріп жатыр
• Жаһандық аптап: Әлемдегі мұхит сулары да қатты ысып жатыр
• +50°C дейінгі ыстық пен қуаңшылық: Шілдеде Қазақстанның көп бөлігінде аптап ыстық болады