Ескертуге қарамастан КҚК теңіз терминалындағы мұнай танкеріне тағы шабуыл жасалды

Ұшқышсыз ұшу аппараты Каспий құбыр консорциумының теңіз терминалындағы №1 қашықтағы айлақ құрылғысында тиеу кезінде тұрған NELSA мұнай танкеріне шабуыл жасады,деп хабарлайды Orda.kz    

Каспий құбыр консорциумы мәліметінше соққыдан кейін кемеде өрт шықты.

КҚК баспасөз қызметінің мәліметінше, дрон танкердің артқы бөлігіне тиген. Соның салдарынан палуба мен кеменің бірнеше ішкі бөлігі өртенген.

«Оң борттың артқы бөлігінде, қондырма мен машина-қазандық бөлімінің арасында соққы салдарынан палубада және танкер бөлімдерінде өрт пайда болды. Өрт бірнеше сағат ішінде танкердің тиеу бригадалары мен КҚК-ның жүзбелі апаттық әрекет ету күштері арқылы сөндірілді. Мұнай тиеу тоқтатылды, мұнайдың төгілуіне және резервуарларда тұтануына жол берілген жоқ»,  деп мәлімдеді баспасөз қызметі. 

Сондай-ақ, бортында 22 адам болған танкер экипажы КҚК сүйремелерімен эвакуацияланғаны, кемеде тек капитан мен оның аға көмекшісі қалғаны айтылды. Соған қарамастан, кеме жүзу қабілетін сақтап қалды.

Бұған дейін 19 шілде күні таңертең ұшқышсыз аппараттар Каспий құбыр консорциумының ҚАҚ-1 (қашықтағы айлақ құрылғысы) және ҚАҚ-3 қашықтағы айлақтарында тиеу кезінде тұрған екі танкерге соққы жасағаны хабарланған еді.

Қазақстан бұл әрекеттерді айыптады.

Біз алдыңғы оқиғадан кейін Қазақстанның Энергетика министрлігі мен Сыртқы істер министрлігі ресми  мәлімдеме жасағанын жаздық. Ведомство 17 және 19 шілдеде Қара теңізде болған азаматтық кемелерге жасалған ұшқышсыз аппараттар шабуылдарын қатаң айыптап, мұндай оқиғалар соңғы күндері бірнеше рет қайталанғанын атап өтті.

Оқи отырыңыз:

• Қазақстан мұнайы тиелген екі танкерге шабуыл жасалды: Министрліктер не дейді?
• БЖЗҚ-дағы барлық жинақты басқарушы компанияға беруге болады