Есірткі таратқандардың жазасы жеңіл болмақ

Мәжіліс есірткіге қатысты заң бұзушылықтарды реттеуге бағытталған заң жобасын екінші оқылымда мақұлдады. Енді есірткі таратқаны үшін жаза жеңілдетіліп, ал өндіргені үшін қатаңдатылды, деп хабарлайды Orda.kz.

Қабылданған өзгерістерге сәйкес, есірткіні сақтау, тасымалдау немесе сатқаны үшін жазалар жеңілдетілсе, есірткі өндіру мен қайта өңдеу бойынша жаза күшейтілді. Енді есірткі сақтағаны және тасымалдағаны үшін берілетін жаза 5-8 жыл аралығына қысқартылды, бұрын 5-10 жыл болған. Ірі көлемдегі есірткімен ұсталғандарға жаза мерзімі 6-10 жыл аралығында белгіленді, бұрын 6-12 жыл болған.

Ал есірткі өндірумен, қайта өңдеумен немесе сату мақсатында заңсыз жасаумен айналысқандарға 15 жылдан 20 жылға дейін немесе өмір бойына бас бостандығынан айыру жазасы тағайындалады. Егер бұл қылмыстарды лауазымды тұлғалар жасаған болса, жаза тіпті қатаң, өмір бойына бас бостандығынан айыруға дейін қарастырылған.

Еске сала кетейік, жақында ғана, Ринат Балғабаевтың «Закладки» деректі фильмінде есірткі таратқаны үшін сотталғандар жазаны жеңілдетуді сұраған болатын.