Енді сталкиң жасағандар 50 тәулікке дейін қамалады

Прокуратура сталкиң үшін қылмыстық жауапкершілік енгізілгенін хабарлады. Жаңа заң бойынша адамды аңдып, тыныштығын бұзғандар енді 50 тәулікке дейін қамалуы мүмкін, деп хабарлайды Orda.kz.
 
16 шілдеде Мемлекет басшысы Қылмыстық кодекске 115-1 – «Сталкиң» жаңа бабы енгізілген Заңға қол қойды.

Прокуратура отандық заңнамада бұл үшін 200 АЕК-ке дейін айыппұл, 200 сағатқа дейін қоғамдық жұмыс немесе 50 тәулікке дейін қамауға алу түріндегі қылмыстық жауапкершілік алғаш рет көзделгенін мәлімдеді.

Егер сталкиң зорлық-зомбылық, қорқыту, бопсалау, жеке өмірге қол сұғылмаушылықты бұзумен қатар жүрсе, іс-әрекеттер ҚК-нің басқа баптары бойынша қосымша сараланады.

«Өз құзыреті шегінде жүзеге асырылатын құқық қорғау органдарының заңды әрекеттері сталкиң белгілеріне жатпайтынын атап өткен жөн», деп мәлімдеді Бас прокуратураның баспасөз қызметі. 

Бас прокуратура азаматтарды сталкиң көріністеріне немқұрайлы қарамауға шақырады. Мұндай жағдай туындаған кезде дереу ішкі істер органдарына хабарласу қажет.