Еліміздегі алғашқы атом электр станциясының атауына қатысты ұсыныстар қабылданады

Алматы облысында салынып жатқан Қазақстандағы алғашқы атом электр станциясының (АЭС) атауы әлі анықталмаған, деп хабарлайды ҚР Атом энергиясы агенттігінің баспасөз қызметіне сілтеп Orda.kz.       

«Қазақстандағы алғашқы АЭС атауы қарастырылады, біз осы бағытта жұмыс істеп жатырмыз. Егер тиісті ұсыныстар болса, оларды қабылдауға дайынбыз» деп жазылған хабарламада. 

8 тамызда Алматы облысы Үлкен ауылында еліміздегі алғашқы атом электр станциясының құрылысына арналған инженерлік-іздестіру жұмыстары ресми түрде басталды.

Еліміздегі АЭС  жергілікті мекемелердің қатысуымен салынатыны белгілі болды.

Ал Қазақстанда бірнеше жылдан бері ядролық отын өндіріледі - Өскемендегі Үлбі металлургия зауытында, ол бүгінде тек қытайлық АЭС үшін ғана өнім шығарады.

Естеріңізге сала кетейік, жұма күні, 8 тамызда Алматы облысында Қазақстандағы алғашқы атом электр станциясын салу жобасы бойынша жұмыстарды іске қосу салтанатты рәсімі өтті. Алаңда геологиялық іздестірудің бір бөлігі болатын бұрғылау жұмыстары басталды.