«Жалпы 14-15 млрд»: АЭС құрылысының құны айтылды

8 тамызда Алматы облысы Үлкен ауылында еліміздегі алғашқы атом электр станциясының құрылысына арналған инженерлік-іздестіру жұмыстары ресми түрде басталды.

Осыған орай өткен іс-шараға Orda.kz тілшілері қатысып, тікелей ақпарат таратып отыр.

Шарада Атом энергетикасы жөніндегі агенттіктің төрағасы Сәтқалиев сөз сөйледі.

«Бүгін біз Ресейлік серіктесіміз – «Росатом» мемлекеттік корпорациясымен бірлесіп, Қазақстандағы алғашқы атом электр станциясының құрылысына бағытталған инженерлік-іздестіру жұмыстарын бастап отырмыз. Бұл кезең – жоба үшін аса маңызды, себебі ол болашақ станцияны орналастыруға ең қолайлы алаңды анықтап, кейінгі жобалау жұмыстары үшін қажетті инженерлік және геологиялық деректерді жинауға негіз болады», — деді сөз басында Сәтқалиев.  

Сонымен қатар ол жобаға инвестициялардың жалпы көлемі 14-15 миллиард долларға жуық болатынын және оның жаһандық стандарттарға сай дамуға сеп болатынын атап өтті.

«Жобаға инвестициялардың жалпы көлемі 14-15 миллиард долларға жуық болады. Сонымен қатар, қосымша 1 миллиард доллар әлеуметтік нысандар мен заманауи инфрақұрылымның құрылысына бөлінбек. Жоба аясында біз қазақстандық кәсіпорындар мен зерттеу ұйымдарының белсенді қатысуына үлкен мән беріп отырмыз. Бұл жергілікті өндірісті жаңа деңгейге шығаруға, мыңдаған жаңа жұмыс орындарын ашуға, ал ядролық ғылымды – жаһандық стандарттарға сай дамытуға мүмкіндік береді», —деді Сәтқалиев. 

Сәтқалиев АЭС-ті «атом өнеркәсібін, индустриялық-инновациялық дамуды және ұзақ мерзімді экономикалық өсуді алға жетелейтін стратегиялық жоба» деп атады.

«Росатом» мемлекеттік корпорациясының бас директоры Алексей Лихачёв Қазақстанның дамуы үшін стратегиялық маңызы зор осы жобаны жүзеге асыруға бар тәжірибесін қолдануға дайын екендерін айтты.

Еске сала кетейік, 2025 жылғы маусымда «Росатом» Қазақстандағы АЭС құрылысы жөніндегі халықаралық консорциумның жетекшісі болып айқындалды.

«Үлкендегі инженерлік іздестірулердің басталуы – Қазақстанның заманауи тарихындағы алғашқы ірі қуатты атом электр станциясына бастайтын жолдың алғашқы қадамы. Бұл кезеңде біз алаңның болашақ атом станциясы үшін толықтай қолайлы екеніне сенімді болу мақсатында мұқият зерттеуге баса назар аударамыз. «Росатом» Қазақстанның дамуы үшін стратегиялық маңызы зор осы жобаны жүзеге асыруға бар тәжірибесін қолдануға дайын», – деді «Росатом»  басшысы Лихачёв.

Болашақ станцияның негізінде электр қуаты 1200 МВт болатын III+ буынның заманауи ВВЭР-1200 су-су энергетикалық реакторлары орнатылады. Бұл технология ең қатаң халықаралық қауіпсіздік талаптарына сай және қазіргі уақытта Ресей, Беларусь, Түркия, Бангладеш, Мысыр және Қытайдағы қолданыстағы әрі салынып жатқан нысандарда табысты пайдаланылып келеді. Реактордың қызмет ету мерзімі – 60 жыл, қосымша 20 жылға ұзарту мүмкіндігі бар.

Сондай-ақ шарада Үлкен ауылының ақсақалы қол жайып, бата берді.