Елімізде соңғы қоңырауға қатысты салтанатты іс-шаралар өтіп жатыр

Биыл елімізде соңғы қоңырау салтанатты іс-шарасы өтетін күн өзгерді, деп хабарлайды оқу-ағарту министрлігіне сілтеме жасап Orda.kz.       

«Биылғы оқу жылының ресми аяқталуы жексенбі күнімен сәйкес келгендіктен, 11-сынып түлектері үшін салтанатты шара мектеп әкімшілігінің шешімімен 23-ші немесе 24-ші мамырда өткізіледі.
Сондай-ақ барлық оқушы үшін тең жағдай мен қауіпсіздікті қамтамасыз ету үшін мектеп форматынан тыс, сән-салтанатты іс-шаралар ұйымдастыру, ақша жинау, автокөлікпен шеруге шығу және басқа да мерекелеу түрлеріне жол берілмейтінін тағы да еске саламыз» деп жазылған министрлік хабарламасында. 

Дәстүр бойынша 34 аптаға созылған оқу жылы аяқталды. Оның қорытындысын республика бойынша 3,9 миллионнан астам мектеп оқушылары шығарады. 217 мыңнан астам он бірінші сынып оқушылары бүгін алтын ұямен қоштасып жатыр.

Бүгін Алматы  полициясы күшейтілген қызмет көрсетуге көшірілді. 

Бұл туралы жергілікті полиция департаменті хабарлады. Күшейтілу жағдайы қала мектептерінде өтіп жатқан соңғы қоңырауға байланысты.

Департамент ата-аналарды және мерекеге қатысушыларды ұқыпты болуға, ережелерді сақтауға және балаларға қауіп төндірмеуге шақырды.

Хабарламада айтылғандай, қаланың негізгі алаңдарында, саябақтарда, скверлерде және азаматтардың жаппай демалу орындарында полицияның кешенді күштерінің қосымша нарядтары бақылауды күшейтті.