Елімізде «Шәмші Қалдаяқов» медалі болады

Елімізде мемлекеттік наградалар тізіміне «Шәмші Қалдаяқов» медалі және «Қазақстанның еңбек сіңірген суретшісі» құрметті атағы қосылады, деп хабарлайды Orda.kz.       

Бұл туралы президенттің кеңесшісі – Қазақстан Республикасы президентінің баспасөз хатшысы Айбек Смадияров мәлімдеді.

«Мәдениет пен өнер – ұлттық болмысымыздың мызғымас тірегі. Сондықтан Жаңа Конституцияда ұлттық мәдениетті жан-жақты қолдау мемлекеттің негізгі қағидаты ретінде жоғары құқықтық деңгейде бекітілді. Осыған байланысты Қазақстан Республикасы президенті Қасым-Жомарт Тоқаев мемлекеттік наградалар тізіміне «Шәмші Қалдаяқов» медалі мен «Қазақстанның еңбек сіңірген суретшісі» құрметті атағын енгізу туралы шешім қабылдады» деп жазды А.Смадияров

Бұл құрметті наградалар ұлттық мәдениетті, соның ішінде музыка мен бейнелеу өнерін дамытуға елеулі үлес қосқан азаматтарға табысталады.

Шәмші Қалдаяқов аса көрнекті сазгер, ән жанрының әйгілі майталманы, Қазақстан мәдениетіне еңбегі сіңген қайраткер, осы замандағы қазақ эстрадасының негізін салушылардың бірі, Қазақстанның халық әртісі. Қазақтың музыка өнерінде Шәмшінің орны ерекше 300-ге жуық әні бар. 

1992 жылдан бастап сазгерлер мен әншілер үшін Қалдаяқов атындағы халықаралық байқау-фестиваль дәстүрлі түрде өткізіліп тұрады.

Бұған дейін Қазақстан президенті Қасым-Жомарт Тоқаев Астанада бір топ қоғам қайраткеріне мемлекеттік наградалар табыстап, олардың әрқайсысының елді дамытуға қосқан үлесін жоғары бағалаған болатын.

Оқи отырыңыз:

• Өскелең ұрпаққа өнеге: Тоқаев бір топ қоғам қайраткеріне мемлекеттік награда тапсырды
• Абай ілімі – рухани шамшырағымыз: Президент халықты Абай күнімен құттықтады
• Қазақстан президенті АҚШ-та өтетін G20 саммитіне қатысады