Елімізде өзге этнос өкілдері балаларын қазақ сыныптарына жиі бере бастады

Жаңа оқу жылында 380 мыңнан астам бала бірінші сыныпқа барады. Елімізде тұратын басқа ұлт өкілдері балаларын қазақ сыныптарына жиі бере бастады, деп хабарлайды Orda.kz Оқу-ағарту министрлігінің мәліметіне сілтеп.

Елімізде өзге ұлт өкілдері арасында балаларын қазақ тілінде білім беретін сыныптарға беру үрдісі жылдан жылға артып келеді.

«Болашақ бірінші сынып оқушыларының 71 пайыздан астамы қазақ тілінде білім беретін сыныпты таңдаған, 26 пайыздан астамы – орыс тілінде, тағы шамамен 2,5 пайызы басқа тілдерде білім алатын сыныптарға берілген. Сонымен қатар өзге ұлт өкілдерінің 2 мыңнан астам баласы қазақ тілінде білім беретін сыныптарға қабылданды. Бұл ата-аналардың балаларын қазақ тілінде оқытуға қызығушылығы артып келе жатқанын көрсетеді», деп хабарлады сәрсенбі күні Оқу-ағарту министрлігінің баспасөз қызметі. 

Ведомствоның мәліметінше, Қазақстанда балаларды бірінші сыныпқа қабылдау үшін құжат тапсыру әлі де жалғасып жатыр.

«Жаңа оқу жылында мектеп табалдырығын 380 мыңнан астам бірінші сынып оқушысы аттайды деп күтілуде. Бүгінде болжамды көрсеткіштің шамамен 84 пайызы, яғни 320 мыңға жуық бала ел мектептеріне қабылданып үлгерді. Оның ішінде шамамен 296 мың бала мемлекеттік мектептерде, 23 мыңға жуығы жекеменшік мектептерде білім алады. Қалалық мектептерге 191 мыңға жуық, ауылдық мектептерге шамамен 128 мың бала қабылданды. Сонымен қатар білім беру ұйымдарына ерекше білім беру қажеттіліктері бар 4 мыңға жуық бала қабылданды» деп жазылған хабарламада. 

Оқу-ағарту министрлігі мәліметінше, құжат қабылдау министрлік пен Жасанды интеллект және цифрлық даму министрлігінің бірлескен бұйрығы негізінде жүзеге асырылатын пилоттық жоба аясында жүргізіліп жатыр.

Өтініштер бекітілген кестеге сәйкес 2026 жылғы 27 мамырдан 31 тамызға дейін кезең-кезеңімен қабылданады.

«Өтініштердің шамамен 84 пайызын ата-аналар электронды түрде тапсырды. Құжаттарды электронды үкімет порталы немесе оның мобильді қосымшасы арқылы, сондай-ақ ата-ана таңдаған мектепке тікелей барып рәсімдеуге болады», деп хабарлады министрлік.

Оқу-ағарту министрлігі хабарлауынша, бұл аталған өңірлердегі халық санының көптігі және туу көрсеткішінің жоғары болуына байланысты.

Ведомство ата-аналарға қажетті құжаттарды белгіленген мерзімде рәсімдеуге кеңес берді.

Оқи отырыңыз:

• Алматылық мектеп оқушысы БҰҰ-да ауадан су өндіру технологиясын таныстырды
• Алматыда ерекше балаларды оқытатын тағы бір мектеп жұмысын тоқтатуға мәжбүр
• Биыл 3,9 миллион түлек мектеп бітірді, 13 175 оқушы «Алтын белгіге» үміткер