Елімізде білім грантына өтініш қабылдау басталды

Қазақстанда 13–20 шілде аралығында талапкерлерден білім беру гранттары конкурсына қатысу үшін өтініш қабылдау басталды, деп хабарлайды Orda.kz.       

Құжаттарды жоғары оқу орындарының қабылдау орталықтары арқылы офлайн түрде, сондай-ақ онлайн форматта виртуалды комиссиялар немесе eGov.kz порталы арқылы тапсыруға болады.

Бұл туралы Ғылым және жоғары білім министрлігі мәлімдеді. Конкурсқа қатысу үшін талапкерлер жеке куәлік, ҰБТ сертификаты, 3×4 форматтағы фотосурет, орта білім туралы аттестат (колледж түлектері үшін диплом) ұсынуы тиіс.

Сондай-ақ жеңілдік санатына жататындар тиісті растайтын құжатын қоса тапсырады.

ҰБТ нәтижесіне сәйкес білім гранты конкурсына және ақылы бөлімге түсу үшін келесі шекті балл белгіленген:

• «Педагогикалық ғылымдар» және «Құқық» — кемінде 75 балл;
• «Денсаулық сақтау» — кемінде 70 балл;
• Ұлттық университеттерге түсу — кемінде 65 балл;
• Басқа жоғары оқу орындарына — кемінде 50 балл.

Айта кетейік, жоғары оқу орындары өз бетінше қосымша шекті балл белгілей алады.

Ауыл жастары мен әлеуметтік осал топтарға қабылдау науқаны аясында арнайы қолдау қарастырылған. Атап айтқанда, мемлекеттік грантты бөлу кезінде белгіленген квоталар қолданылады.

Білім гранты иегерлері тізімі 10 тамызға дейін жарияланады.

Еске салсақ, 2026–2027 оқу жылында жоғары білім алуға бөлінетін мемлекеттік тапсырыс көлемі бұрынғы деңгейде сақталады. Жалпы саны 89 457 грант қарастырылған. Оның ішінде 75 371 грант бакалавриатқа, 11 007 грант магистратураға, ал 3 079 грант докторантураға бөлінеді.

Оқи отырыңыз:

• Қандай мамандар сұраныста: Биылғы жылға арналған гранттар бөлінісі
• БАҚ бойынша президенттің 2026 жылғы сыйлықтары мен гранттарына ұсыным қабылдау басталды
• Қазақстандағы ЖОО-лар бірқатар мамандықтарды қысқарта бастады