Елімізде бензин мен дизель отынының бағасы шарықтайды

Бензиннің қазіргі бағасы тым төмен екенін айтқан вице-премьер Роман Скляр бағаның өсетінін мәлімдеді, деп хабарлайды Orda.kz.

Склярдың сөзінше Қазақстанда барлық мүмкіндіктерге қарамастан, мұнай өнімдері жеткілікті өндірілмейді. Ол біраз мәселелерді айтып, бағаның «теңестірілетінін» мәлімдеді.

«Бензин мен дизель отыны бізде көрші елге қарағанда әлдеқайда арзан. Сонымен қатар, оның ағымы бар. Транзиттік көліктер арзан отынмен қамтамасыз етіледі. Сондықтан біз бағаны біртіндеп теңестіреміз. Ал отын өндірісін арттыруға қатысты Шымкентте мұнай өңдеу зауытының екінші кезеңін салу жоспарда бар. Сондай-ақ, қолданыстағы зауыттардың да қуатын арттыру жоспарланған», — деп түсіндірді Скляр.

Ең соңғы мәліметтер бойынша, елден отынның заңсыз шығарылуы 50%-ға төмендеді. Ішкі істер министрлігі, мемлекеттік қауіпсіздік комитетінің шекара қызметі және мемлекеттік кірістер комитетінің өкілдері бірлесіп экспортқа қарсы күресті ұйымдастырғаны туралы баяндама жасады.