Екі құрбысы ажал құшқан жол апаты: Шавкат Рахмоновтың әйелі кінәсін мойындамай отыр

Қазақстандық аралас жекпе-жек шебері Шавкат Рахмоновтың жұбайының адвокаты өліммен аяқталған жол апатына қатысты істі қосымша тергеуге қайтаруды сұрады, деп хабарлайды Orda.kz. 

Гүлайым Рахмонова өз кінәсін мойындамады және соттан өз ұстанымына түсіністікпен қарауды өтінді. Ол жақындарынан айырылғанын айтып, ауыр қайғыны бастан өткеріп жатқанын мәлімдеді.

Оның адвокаты сотта қылмыстық істі қосымша тергеуге қайтару туралы өтінішхат берді. Адвокаттың айтуынша, көліктің төрт дөңгелегі де зақымданған. Сол үшін Гүлайым Рахмонова көлікке ие бола алмаған. Апаттың алдын алу мүмкіндігі болмапты. Сондықтан адвокат қосымша кешенді сараптама тағайындауды қажет деп санайды.

Мемлекеттік айыптаушы өтінішті қанағаттандырудан бас тартуды сұрады. Оның айтуынша, сотқа дейінгі тергеу барысында әйел кінәсін мойындаған және барлық қажетті сараптамалар жүргізілген. Сот адвокаттың өтінішін қанағаттандырмады. Спортшының жұбайы ешқайда кетпеу туралы қолхат жазып, босатылды. 

Еске салсақ, былтыр жазда Жамбыл облысында Шавкат Рахмоновтың жұбайы басқарған көлік апатқа ұшырады. Гүлайым Рахмонова ұлы және құрбыларымен бірге Қарағандыдан Алматыға бара жатқан. Апат салдарынан Гүлайым Рахмонованың 39 және 35 жастағы құрбылары көз жұмды. 

Биыл қаңтар айының соңында прокуратура іс сотқа жолданғанын хабарлады. Алдын ала тыңдау кеше, 16 ақпан күні өтті.

Оқи отырыңыз:

• Шавкат Рахмонов екінші ота жасатқанын айтып UFC-ге оралуды кейінге қалдырды
• Шавкат Рахмонов UFC-дің жартылай орта салмақ дәрежесіндегі рейтингінен шығып қалды