Екі елдің басшысы Мәскеудегі болатын шеруден бас тартты

9 мамыр күні Ресей астанасында өтетін шеруге Әзірбайжан президенті қатыспайды, деп хабарлайды Orda.kz.

Бұл туралы Әзірбайжан президенті Ильхам Әлиевтің көмекшісі Юрий Ушаков мәлімдеді.

«Бізге ол Гейдар Әлиевке арналған ішкі іс-шараларға қатысатынын айтты», – деді Ушаков. 

Ресей Мемлекеттік Думасының депутаты Светлана Журова Әлиевтің басқа шеруге қатысуы мүмкін екенін айтты.

«Біз бірден жаман ойламауымыз керек. Әлиев 9 мамырға байланысты өзінің шерулерін немесе іс-шараларын ұйымдастырғалы отырған шығар. Оның Әзірбайжанда болуы – елдегі патриоттық рухты көтеру үшін қажет».

Айта кетейік, Әзірбайжан президенті сияқты Лаос президенті Тхонглун Сисулит те бұл шараға бармайды.

Еске сала кетсек, 6 қаңтарда Әзірбайжан президенті Ильхам Әлиев  Баку-Грозный бағыты бойынша ұшқан AZAL ұшағы жолаушыларының өліміне қатысты Ресей өкілдерін айыптап, батыл мәлімдеме жасаған еді. Ұшақ апаты 25 желтоқсан күні болды. AZAL әуе компаниясының Бакуден Грозныйға бет алған Embraer ұшағы Қазақстанның Ақтау қаласы маңында құлады. 38 адам қаза тауып, 29 адам жарақат алды. Әзірбайжан халқы 26 желтоқсан күнін апат құрбандарын еске алатын қаралы күн деп жариялады.

Ал Қазақстан жеңістің 80 жылдығына қызу дайындалып жатыр. Бұған дейін жеңістің 80 жылдығына арналған шеруге 2,5 млрд теңге жұмсалатыны айтылды. 

Сонымен қатар, Orda.kz Ресей президенті Владимир Путин «Казахстанская правда» газетіне берген сұхбатында Қасым-Жомарт Тоқаев пен қазақстандық достарын жеңістің 80 жылдығына арналған  мерекеге шақырғаны жайлы жазған болатын. Ал Astana Think Tank форумының қорытынды отырысында Тоқаев «Ресейдің Украинадағы соғыста жеңілмейтінін» айтқан болатын.