«Джей Ло концертіне билет»: Ticketon бір жылдық пайдасынан айырылды

Ticketon қызмет көрсету орталығы Дженнифер Лопестің концертіне билет сатқанда сайт істемей, техникалық ақау болған еді. Осы үшін компания азаматтарға билет ақысын қайтарып, қосымша өтемақы төлегелі жатыр, деп хабарлайды Orda.kz.

Бұл туралы Freedom Holding компаниясының басшысы Тимур Турлов Threads желісіндегі парақшасында мәлімдеді.

«Мұндай концертке деген жоғары сұраныс бұрын-соңды болмаған. Сол үшін билеттерді сатып жатқанда сайт көтере алмай, база күйреді. Соның салдарынан көп билет бірнеше рет сатылып кетті. Әріптестеріміз билеттердің қайта сатылып жатқанын байқаған кезде сатуды тоқтатты» деп жазды ол.

Турловтың айтуынша, олар мыңдаған броньды қолмен ауыстыруға тырысқан. Компания концертке барғысы келетіндерге тегін жаңартылған (upgrade) билеттер ұсыну үшін ұйымдастырушылардан қымбатырақ билеттерді өз есебінен сатып алу туралы шешім қабылдаған. Дегенмен, Турловтың айтуынша, бұл шешім бәріне бірдей ұнай қоймайтынын олар біледі.

«Біріншіден, біз барлық клиентке ақысын толық қайтарамыз. Бұл — концерттен түсетін біздің жалғыз табысымыз. Екіншіден, «дубль» болған клиенттерге арзанырақ балама жолдар табылған жағдайда, біз ұйымдастырушылардан билетті өз есебімізден сатып алып, ақшасын клиентке қайтарамыз. Олар концертке тегін бара алады. Үшіншіден, егер біреудің орны ауысып, билеті басқа орынға немесе билеті қымбаттау болған фан-аймаққа (би алаңына) ауыстырылса, біз билеттің 50%-ына тең өтемақы төлейміз. Бұл ретте билетті толық құны бойынша қайтарып, 50% өтемақыны да алуға болады. Төртіншіден, егер біз балама таба алмаған және ваучер бере алмаған клиенттер болса, оларға ақшасын толық қайтарамыз және билет құнына тең өтемақы төлейміз. Яғни, олар екі есе ақшасын қайтарып ала алады» деп жазды Турлов.

Оның айтуынша, жалпы өтемақы қаражаты бірнеше жүз миллион теңге болған. Бұл олардың бір жылдық пайдасына тең шығын.

Еске сала кетейік, үкімет танымал әнші Дженнифер Лопестің Астанадағы концертіне 15 мыңға жуық турист келіп, мемлекеттік бюджетке 400 миллион теңге көлемінде салық түсетініне сенімді.