«Дүниежүзілік көшпенділер ойындары»: Қазақстан садақшылары жүлделі болды

Қазақстан садақшылары Дүниежүзілік көшпенділер ойындарынан қола және күміс медаль жеңіп алды, деп хабарлады Orda.kz.

Ербол Тәпенов пен Қасымхан Қанат дәстүрлі садақ атудан өткен беделді жарыстың финалына шығып, «Қалқан» сайысында күміс пен қола медаль жеңіп алды.

Сайыстың финалы бүгін сағат 16:00-де «Арғымақ» ат-спорт кешенінде өтті.

Жарысқа 33 елден келген 180 спортшы қатысты, оның ішінде Қазақстан атынан 10 үздік садақшы ел намысын қорғады. «Қалқан» сайысында ерлер 60 метрден, әйелдер 50 метрден мергендігін көрсетті. Бұған дейін Айкөркем Батихан әйелдер арасында қола медаль жеңіп алса, Қасымхан Қанат пен Жәнібек Құлмырзаев «Пута» сайысында ерлер арасында қола мен алтын медальды иеленді.

Еске сала кетсек, Қазақстан құрамасы көкпардан АҚШ-ты ойсырата жеңген болатын. Енді құрама Қырғызстанмен сайысқа түседі.

Айта кетсек, Orda.kz жарыстың екінші күнінің қорытындысы жайлы жазған болатын. Қазақстан ұлттық құрамасы Дүниежүзілік көшпенділер ойындарының екінші күнінде 14 алтын, 3 күміс, 8 қола медаль алды.