«Думанның соңғы сөзі»: 20 рет соты болған Думан не деді?

Бүгін «Тыйым салынған ұйымның ісіне араласу» және «экстремизмді қаржыландыру» айыптары тағылған Думан Мұхаммедкәрімге қатысты Қонаев қалалық сотында жиырмасыншы жабық сот отырысы өтті. Онда Думан Мұхаммедкәрім өзінің соңғы сөзін айтты.

Orda.kz тілшісі осы сотқа арнайы барып қайтты. 

Думан Мұхаммедкәрімді қолдап жиналған жұрт қарасы көп болды. Олар Думанға бостандық талап етіп келген болатын. Адвокат сот отырысына қатысып шығып, сөз сөйлегеннен кейін, белсенділер мен жиналған жұрт ертеңгі сот отырысын күтуге келісті. Белсенді Абзал Достиярды сот отырысы басталмай тұрып полиция қызметкерлері алып кетті.

«Бүгінгі сот отырысында Думан өзінің соңғы сөзін айтты. Соңғы сөзінде ол тағылған айыптарды жоққа шығарып, мойындамайтынын айтты. Кінәсінің дәлелденбегендігін, өзінің ешқандай заң бұзушылық жасамағанын айтып, наразылығын білдірді. Заңсыздықты мойындамайтынын айтты. Сондықтан осымен сот аяқталды. Ертең кешкі сағат алтыда үкімді жариялайды. Сотқа біз сұрақ қойдық. Үкімді жариялау ашық бола ма, жабық бола ма, деп сұрадық. Бізге хатшы қосымша жауап беретінін айтты», — деді Думан Мұхамедкәрімнің адвокаты.

Еске сала кетейік, бұған дейін Думан Мұхамедкәрімнің сотына қатысты баспасөз мәслихаты өткен болатын.