Дипфейктер шабуыл жасауда: Желіде «Өшпес полк» акциясына шығуға шақыратын жаңа жалған роликтер көбейді

Жеңіс күні жақындап келе жатқанда, интернетте белгілі журналистер мен шенеуніктер қазақстандықтарды 9 мамырдағы шеруге шығуға шақырған бейнероликтер көбейіп жатыр. Қазіргі заманғы технологиялардың арқасында қолдан жасалған бейнежазбалар өте шынайы болып шығады, бірақ бұл арандатушылыққа толы жалған бейнелер, деп хабарлайды Orda.kz.

Біз Қазақстанда  «Өшпес полк» акциясы төңірегінде туындаған жанжал туралы жаздық. Танымал тұлғалар шеруге шақыратын жалған роликтердің кейіпкерлері ретінде  шабуылдаушылар СҚО әкімі Гауез Нұрмұхамбетовты, Қостанай облысының әкімі Құмар Ақсақаловты, тіпті премьер-министр Олжас Бектеновті де пайдаланды.

Журналистер де шет қалмады. Мессенджерлерде 9 мамырда «Өшрес полк» шеруіне шығуға шақыратын хабарламалардың жаңа толқыны таратыла бастады. Ұйымдастырушылардың байланысы ретінде «Орданың» бас редакторы Гүлнәр Бажкенованың, Shyndyk порталының бас редакторы Ғазиза Райымбектің, журналистер Вадим Борейко мен Динара Сатжанның телефон нөмірлері көрсетілген.

Жақында таратылған жаңа бейнероликтерде журналистердің өздері «Өшпес полк» акциясын қолдауға шақырып отыр. Шабуылдаушылар бұл жолы медиаменеджер Сырым Итқұловтың, «Орда» бас редакторы Гүлнәр Бажкенованың, журналист Вадим Борейконың бейнелерін пайдаланған.

Дипфейк - бұл жасанды интеллект көмегімен жасалған бейне. Нейрожелі интернеттен адамның фотосуреттері мен бейнелерін жинайды. Алгоритм оларды талдайды және бұл адамның қалай көрінетінін, сөйлеу мәнерін және қозғалысын үйренеді. Содан кейін осы деректер негізінде жаңа ролик жасайды.

Видеоларды кім және не үшін жасайтыны белгісіз. Арандатушылыққа алданбай, тек ресми ақпарат көздеріне ғана сенген жөн.

Дегенмен Алматыда 9 мамырда еске алу акциясы өтетіні рас.  «Батырларға тағзым» шарасының ресми ұйымдастырушылары - қала әкімдігінің қолдауымен ардагерлер бірлестіктері. Басталуы сағат 10: 15-ке жоспарланған. Қатысушылар Орталық парктен 28 панфиловшылар паркіне дейін жүріп өтіп, Мәңгілік алауға гүл шоқтарын қояды.