Димаш халықаралық сыйлығын Бибігүл Төлегеноваға арнады

Orda.kz бұған дейін қазақтың танымал әншісі Димаш Құдайберген халықаралық Distinctive International Arab Festivals Awards (DIAFA) сыйлығын өнерге қосқан үлесі үшін алғаны жайлы жазған болатын. Бұл жүлдені әнші Instagram парақшасында атақты опера әншісі Бибігүл Төлегенованың 95 жылдық мерейтойына арнағанын жариялады, деп хабарлайды Orda.kz.

«Құрметті Бибігүл Ахметқызы! Күні кеше алған кезекті марапатымды алдағы келе жатқан 95 жылдық мерейтойыңыздың қарсаңында, Сіздің құрметіңізге арнауға рұқсат етіңіз. Жастайымнан сіздің жоғары дәрежедегі өнеріңізге сусындап өсіп, сіздің аналық, ұстаздық өсиеттеріңіз бен батаңыздың арқасында қазіргі күні азды көпті жетістіктерге қол жеткізіп келемін. Құрметті #dears, құрметті жерлестер! Шын жүректен барлық құттықтауларыңызға көп рахмет айтқым келеді. Еліміз аман, жұртымыз тыныш болсын!» деп жазды Димаш. 

Еске сала кетсек, бұған дейін Orda.kz Бибігүл Төлегенованың  95 жылдық мерей тойы өткенін жазған болатын.