Депутаттың ұлы түрмеге қамалуы мүмкін: Тұрлыхановтың ұлы жайлы

Депутат Дәулет Тұрлыханов тағы да даудың ортасында қалды. Бұл жолы оның ұлы Нұрасыл Болат арнайы бақылау уақытын бұзып, сыртта жүргені үшін түрмеге жіберілуі мүмкін, деп хабарлайды Orda.kz.

Бүгін мәжіліс дәліздерінің бірінде Тұрлыханов ұлының тәртіпсіздіктері жайлы журналистерге пікірін айтты. Ол Нұрасылды жақсы, тәрбиелі жігіт ретінде сипаттады.

«Неге бұлай болып жатқанын түсінбеймін. Менің ұлымның соңына түсіп алған. Оның жасы небәрі 21-де. Егер оның психикалық денсаулығына зиян келсе, оған кім жауап береді? Менің ұлым өте жақсы және тәрбиелі бала. Достарымен араласуға немесе туған күнге баруға болмай ма?» — деді депутат. 

Еске сала кетейік, бұған дейін Нұрасыл Болат Алматыдағы түнгі клубтың жанында заңгер ерлі-зайыптыларды, Анна мен Олег Черновтарды ұрып-соққан болатын. Оқиға өткен жылдың ақпанында Алматыдағы бір мейрамханада болды. Ол кезде Нұрасыл Болат әскери борышын өтеп жатқан бөлімшесінен 350 шақырым жерде болған.

Еске сала кетсек, жанжалдан соң қазақстардықтар депутат Тұрлыхановтың қызметтен кетуін талап еткен болатын. Алайда ол мандатынан бас тартпайтынын, «халық өзін жақсы көретінін» айтқан  еді.