«Халық мені жақсы көреді»: Депутат Тұрлыхановтың ұлы тағы да жанжалдың ортасында 

Мәжіліс депутаты Дәулет Тұрлыхановтың ұлы Нұрасыл Болат тағы да жанжалдың ортасында қалды.

Адвокат Анна Чернова әлеуметтік желілерде Нұрасыл Болаттың Алматыда түнде мейрамханада жүрген  бейнежазбасын жариялады. 

Бұл бейнежазбада  Нұрасыл Болаттың Жоғарғы соттың екі жыл бостандығын шектеу туралы үкімін орындамай, көшеде жүргені көрінеді. Үкімге сәйкес Нұрасыл пробациялық бақылауда болуға тиіс. Оның тіркеуі Астанада. Бейнежазбада оның қызға қол көтергені айтылды.

«Қаншама заң бұзушылық бар?!. ҚР Ішкі істер министрлігінің Қылмыстық-атқару жүйесі комитетіне менің сұрағым бар. Қалайша мұндай жағдай болып жатыр? Бұл біздің елде үкімдер ішінара таңдалып орындалатынын тағы да көрсетіп тұр. Комитет қызметкерлеріне және депутаттың ұлына қатысты алдын ала тергеу бастауды сұраймын» деп жазды Анна Чернова.

Оқиға 2024 жылдың 14 ақпанында Алматыдағы бір мейрамханада болды. Заңгерлер Анна мен Олег Черновтар зорлық-зомбылыққа ұшыраған қызға көмек көрсетпек болғанда, Нұрасыл Болат оларға да қол көтерген. Ол кезде Нұрасыл Болат борышын өтеп жатқан бөлімшесінен 350 шақырым жерде болған.

Еске сала кетсек, жанжалдан соң қазақстардықтар депутат Тұрлыхановтың қызметтен кетуін талап еткен болатын. Алайда ол мандатынан бас тартпайтынын айтып, «халық өзін жақсы көретінін» айтқан  еді.

Orda.kz құқықтық-атқару жүйесі комитетінен ресми түсініктеме күтеді.