Депутат Қайрат Сатыбалдының бостандыққа шығуы жайлы сөз қозғады

Мәжіліс депутаты Ермұрат Бапи экс-президент Нұрсұлтан Назарбаевтың немере інісі Қайрат Сатыбалдының активтерін қайтару туралы ақпаратқа күмән келтірді. Ол шартты түрде мерзімінен бұрын босатуға немесе рақымшылық жасауға дайындап жатыр деп ойлайды.

Бұл туралы Ермұрат Бапи facebook әлеуметтік желісінде хабарлады.

«Оны шартты түрде мерзімінен бұрын босатуға дайындап жатыр ма, әлде таза рақымшылық жасап жатыр ма? Ұрланған мүлкін өз еркімен қайтарғаны жақсы. Бірақ бұл мүліктердің ел қазынасына түсетіні қаншалықты рас?  Көрсетілген ресми сандарға сенеміз бе, әлде себейміз бе, оны тек болжау ғана қалды. Себебі қайтарылған активтер 100 пайыз жинақталған мемлекеттік компанияға қоғамдық бақылау жоқ», — дейді Бапи.

Сонымен қатар, Бас прокуратураның мәліметінше Қайрат Сатыбалды активтерді қайтару комитетімен өз кінәсін ерікті түрде мойындап, заңсыз жолмен алынған тағы 50 миллиард теңгеден астам мүлікті қайтару туралы процессуалдық келісімге қол қойғаны бүгін мәлім болды.

Сондай-ақ, алдағы уақытта тағы 33 миллиардқа жуық активтерді қайтару жоспарлануда. Бұл Сатыбалдының өзіне және жақын адамдарына тиесілі шетелдегі мүліктер.

Еске сала кетейік, бұған дейін Қайрат Сатыбалды мемлекетке 1,6 млрд АҚШ доллардан астам мүліктік активтер мен ақшалай қаражат қайтарған болатын.