Цифрлық ҚҚС: Қосылған құн салығы бизнеске не береді?

Мемлекеттік кірістер комитеті Ұлттық банкпен бірлесіп 2024 жылдың төртінші тоқсанынан бастап цифрлық теңгені пайдаланып, «Цифрлық ҚҚС» пилоттық жобасын жүзеге асырып жатыр, деп хабарлайды Orda.kz.       

Бұл туралы Мемлекеттік кірістер комитеті хабарлады.

«Цифрлық теңге – бұл блокчейн технологиясына негізделген ұлттық валютаның жаңа цифрлық нысаны, ол ақшаны қатаң түрде мақсаты бойынша пайдалану үшін бағдарламалауға мүмкіндік береді. Пилоттық бағдарламаға қатысу үшін экспорттаушы компаниялар екінші деңгейлі банктер арқылы Ұлттық банктен ҚҚС белгіленген цифрлық теңгені сатып ала алады. Цифрлық теңгенің белгіленген бөлігін басқа мақсаттарға пайдалануға немесе қолма-қол ақшаға айналдыруға болмайды – бұл қаражат тек жеткізушілермен және бюджетпен есеп айырысуға арналған» деп жазылған таратылған хабарламада. 

Комитет цифрлық теңге арқылы жасалатын операциялар туралы барлық ақпаратты, сондай-ақ жеткізушілер арасындағы ҚҚС қозғалысы және бюджетке түсетін түсімдер туралы ақпаратты Ұлттық банк мемлекеттік кірістер органдарына беретінін түсіндірді.

«Мұндай механизм мемлекеттік кірістер органдарына салық тәуекелдерінсіз қысқа мерзімде ҚҚС қайтару үшін жеткілікті ақпарат алуға мүмкіндік береді».