Бүлінген бейнекамера үшін алты жыл — Қазақстанда заң күшейді

Қылмыстық-атқару жүйесі комитетінің (ҚАЖК) мәліметінше, бір жыл ішінде Қазақстанда колонияларда бейнебақылау камераларын бұзуға байланысты 70 қылмыстық іс қозғалды, деп хабарлайды Orda.kz.

ҚАЖК нақтылағандай, 2024 жылғы шілдеден бастап ҚР Қылмыстық кодексіне 428-1-бап енгізілді. Бұл бап ҚАЖ мекемелеріндегі бейнебақылау камераларын қасақана бұзу немесе істен шығару үшін қылмыстық жауапкершілікті қарастырады.

Аталған бап бостандығынан айырылған орындарға тәулік бойы бейнебақылау жүйесін жаппай енгізуге байланысты қабылданды.

«Бап күшіне енген алғашқы жылда 70-тен астам қылмыстық іс қозғалды. 35 сотталған адамға қосымша жаза мерзімі тағайындалып, келтірілген материалдық шығынды өтеу міндеттелді. Мысалы, Шымкент қаласындағы №55 мекемеде 13 сотталған азамат бейнебақылау камераларын әдейі істен шығарған. Сот үкімімен олардың әрқайсысына қосымша алты жыл бас бостандығынан айыру жазасы тағайындалды»,  деп мәлімдеді комитет өкілдері.

Комитет дерегінше, ел бойынша 78 түзеу мекемесінде 43 мыңнан астам бейнекамера орнатылған. Бұл құрылғылар мекемедегі барлық процесті тіркеп, айқындықты қамтамасыз етеді – тек сотталғандарға қатысты емес, ҚАЖ қызметкерлерінің әрекеті де бақылауда.

Сотталған супермарафоншы Марат Жыланбаевтың денсаулық жағдайы туралы мына жерден оқыңыз.

280 миллион теңгеге үй мен көлік алған Шымкенттік тағы бір зергерлік  қаржы пирамидасы әшкереленді.