Burger King жанжалы: Шетелден келген басшы инклюзив жігітті қудалап жатыр ма?

Әлемге әйгілі Burger King-тің Қазақстандағы желісінде дау туды. Аутизммен ауыратын Әлібек есімді ұлын себепсіз жұмыстан босатты деп анасы Threads әлеуметтік желісіне жазба жариялап, көпшіліктің назарын өзіне аудартты. Ал бұл туралы компания да үнсіз қалмай жауап берді. Оқиға неден және қалай басталғаны туралы Orda.kz түсіндіреді.

Оқиға неден басталды?

Жанат Қаратай есімді Threads қолданушысы өзінің ұлы 4 жыл бойы Burger King желісінде қызмет етіп, ендігі жерде себепсіз жұмыстан шығаруға қысым жасалып жатқаны туралы жазды.

«Ол әр жерде жұмыс істеп көрді, ақыры өзіне ұнайтын әрі өзін табысты сезінетін ұжым мен мамандығын тапты. Ол Burger King-тегі аспаз жұмысы. Осында 4 жыл бойы тұрақты жұмыс істеді, жалақы алды, тапқан ақшасын қуана жұмсады, өзін ұжымның бір бөлігі ретінде сезінді... Алайда жаңа аймақтық басшы Сергей келген сәттен бастап бәрі өзгерді. Үнсіз қысым (қудалау) басталды. Күзден бері Әлібектің жағдайы болмай кетті. Не болып жатқанын бізге біреу хабар жеткізгенше білмедік, сөйтсек оны жұмыстан өз еркімен кетуге мәжбүрлеп жатыр екен» деп жазды Жанат.

Жанат ұлын жұмысқа қайта орналастыру үшін бар күшін салып жатқанын айтады. Сергейдің жақында ғана сырт елден келгенін де жазды. Ал онымен сөйлесу мүлде мүмкін болмаған. 

«Оның сырт елден жақында келгені анықталды. Инклюзив адамдармен қалай жұмыс істеу керегінен де бейхабар. Аутист адамдардың бәрімен тең дәрежеде жұмыс істей алатынын бұрын-соңды естімеген де, кездестірмеген де» деп жазды ол.

Компания үнсіз қалмады

Жанаттың жазбасынан кейін компания өкілдері пікір білдірді. Олардың мәліметінше, оқиға мүлдем басқаша болған.

Компания мәліметінше, HR бөліміне 29 қаңтарда Әлібек Қаратай еңбек демалысына шығатыны туралы хабарлама келген және ол сол күннен бастап жұмысқа келмей қойған. Компания бұл туралы ешқандай өтініш алмаған. 6 ақпанда Жанат ұлының жұмыстан шығу туралы өтінішін алып келгенімен, компания оны да қабылдай алмаған. Өйткені мұндай өтініштерді ҚР заңнамасына сәйкес, жұмыскердің өзі жазуы керек. 

«Біз ашық әңгімеде қызметкер және оның отбасымен мәселені жұмыс форматында талқылауға дайынбыз» деп жазды компания.

Еңбек және халықты әлеуметтік қорғау министрлігі бұл оқиғадан хабардар

Аталмыш даудан кейін Жанаттың жазбасына Еңбек және халықты әлеуметтік қолдау министрлігі де пікір білдірді. Олардың пікірінше, министрлік бұл жағдайдан хабардар.

«Қазіргі уақытта Еңбек мемлекеттік инспекциясы комитетінің аумақтық департаменті болған оқиғаның мән-жайын анықтап жатыр. Қолданыстағы еңбек заңнамасы аясында барлық фактіге құқықтық баға беріледі. Министрлік қызметкерлер мен жұмыс берушілердің құқықтарын сақтау қағидатын негізге алады және тараптарды сындарлы өзара әрекетке шақырады» деп жазды министрлік.

Burger King — әлемге танымал жылдам тамақтану мейрамханалар желісі. Компания 1954 жылы АҚШ-тың Майами қаласында құрылған. Негізгі өнімдері — гамбургер, чизбургер, картоп фри, тауық етінен жасалған тағамдар және түрлі сусындар. Қазақстан нарығына 2012 жылы келді. Алғашқы мейрамхана 2012 жылдың 28 мамырында Алматы қаласында ашылды. Кейіннен желі Астана (қазіргі Астана), Шымкент және басқа да қалаларға кеңейді. Қазақстанда мейрамханалар франчайзинг жүйесі бойынша жұмыс істейді, яғни жергілікті компания басқарады.

Оқи отырыңыз:

• Тоқаев Литва президентіне құттықтау жеделхатын жолдады
• Қазақстан McDonald’s желісін етпен қамтамасыз ете алмады
• Ақтаудағы Назарбаев ашқан шыныпластик құбыр шығаратын зауытта тапсырыс жоқ