«Бұндайларға рақым жоқ»: Садыр Жапаров «халық жауларын» жазалауға шақырды

Қырғызстан президенті Садыр Жапаров сыртқы күштерден ақша алып, Қырғызстандағы жағдайды тұрақсыздандыруға тырысатын адамдарды қатаң жазалауды талап етті, деп хабарлайды Orda.kz 24.kg сайтына сілтеме жасап.

Бұл туралы Қырғызстан басшысы бүгін Бішкекте Шанхай ынтымақтастық ұйымы саммиті мен VI Дүниежүзілік көшпенділер ойындары қауіпсіздігін қамтамасыз ететін күш құрылымдарының гарнизондық сап түзеу рәсімі кезінде мәлімдеді

«Біз арамыздағы сыртқы күштердің ықпалына еріп, олардан ақша алып, елдегі жағдайды ушықтырып, халық арасында үрей таратқысы келетін санаулы халық жауларын қатаң жазалауымыз керек. Мұндайларға рақым болмайды», – деді Садыр Жапаров. 

Қырғызстан президенті елдің дамуының басты шарттарының бірі – қатаң тәртіп екенін атап өтті. Сондай-ақ күш құрылымдарынан жоғары кәсібилік пен жауапкершілікті талап етті.

Жапаров құқық қорғау органдарының материалдық-техникалық базасын нығайту, қызметкерлердің жалақысын көтеру, әлеуметтік қолдауды кеңейту және цифрлық технологияларды енгізу қажеттігін де айтты.

Бұған дейін Қырғызстан билігі Шанхай ынтымақтастық ұйымына мүше мемлекеттер басшыларының саммиті мен VI Дүниежүзілік көшпенділер ойындары қарсаңында елдегі қауіпсіздік шараларын күшейтетіні хабарланған болатын.

VI Дүниежүзілік көшпенділер ойындары Қырғызстанда 31 тамыз бен 6 қыркүйек аралығында өтеді. Оған 100-ден астам елден шамамен 3 мың спортшы қатысады деп жоспарланып отыр. Ойындардың бағдарламасы ЮНЕСКО-ның материалдық емес мәдени мұра тізіміне енгізілген.

Шанхай ынтымақтастық ұйымына мүше мемлекеттер көшбасшыларының саммиті 30 тамыз бен 1 қыркүйек аралығында Бішкекте өтеді деп күтілуде.

Қазіргі таңда Шанхай ынтымақтастық ұйымына 10 мемлекет мүше. Олар: Беларусь, Үндістан, Иран, Қазақстан, Қытай, Қырғызстан, Пәкістан, Ресей, Тәжікстан және Өзбекстан.

Оқи отырыңыз:

• Садыр Жапаров Тоқаевты Қазақстанда жалпыхалықтық референдумның сәтті өтуімен құттықтады
• Тәшиев 2027 жылы президент болуы мүмкін еді: Жапаров өз жоспарын ашып айтты