«Бұл бапты алып тастау қажет»: Журналистер одағының Гүлнәр Бажкеноваға қатысты мәлімдемесі

Қазақстан Журналистер одағы құқық қорғау органдарын еліміздің заңдарын, ең алдымен, кінәсіздік презумпциясын сақтауға шақырып, кеше 2 айға үйқамаққа қамалған Orda.kz сайтының бас редакторына қатысты мәлімдеме жасады, деп хабарлайды Orda.kz.

Кеше, 1 желтоқсан «Орда» редакцияның Алматы мен Астанадағы кеңселерінде, сондай-ақ бас редактордың үйінде тінту жүргізілді. Құқық қорғау өкілдері редакция адвокаттарын ғимаратқа кіргізбей қойды. Күндіз полиция «Орданың» шеф-редакторын, алматылық редакцияның шеф-редакторын, шығарушы редакторды және есепшіні тергеуге алып кетті. Қызметкерлердің телефондарын тәркіледі.

Ал кешке бас редактор Гүлнәр Бажкенованы сотқа дейін 2 айға үйқамаққа қамады. 

Журналистер одағы 274-баптың белсенділер мен журналистерді қудалайтын тетікке айналғанын атап өтті.

«Қылмыстық кодекстен 274 бапты («Көрінеу жалған ақпарат тарату») алып тастау қажет. БАҚ пен журналистердің қоғам алдындағы жауапкершілігін түсіне отырып, Бас прокуратура мен Жоғарғы сотқа 274-бапты азаматтық-құқықтық қатынастар санатына ауыстыру мүмкіндігін қарастыруды ұсынамыз. Жалған не жала жабу сипатындағы ақпарат таралды деген тұлғалар немесе ұйымдар өз беделін тек азаматтық-құқықтық қатынастар аясында ғана қорғауы тиіс. Аталған бап журналистер мен белсенділерді қылмыстық жауапкершілікке тартудың әмбебап тетігіне айналды», — деп мәлімдеді Журналистер одағы.

Журналистік қауымдастық тергеу органдарынан Гүлнәр Бажкенованың ісін жан-жақты, объективті және бейтарап тексеруді сұрайды.

«Журналистер одағы әріптестерін ақпаратты дайындау және таратуға жауапкершілікпен қарауға шақырады. Жалған ақпарат таратуға қатысты жекелеген жағдайлар еліміздегі бүкіл журналистік қауымдастыққа көлеңке түсіреді», — деді Журналистер одағы өз мәлімдемесінде. 

Айта кетейік, Қазақстан Журналистер одағы – журналистер қауымдастығының 6000 мүшесін біріктіретін еліміздегі ең ірі шығармашылық бірлестік.

Еске сала кетсек, кеше құқық қорғаушы Галым Агелеуов «Дождь» телеарнасында Orda.kz жайлы сөз сөйледі. Ол Қазақстанда журналистерге еркіндік жоқ екенін атап өтіп, Гүлнәр Бажкеноваға қарсы қозғалған істердің саяси тапсырыс екенін ашық айтты. Оның сөзінше, Қылмыстық кодекстің 274-бабы («Көрінеу жалған ақпарат тарату») мен 174-бабы («Араздық қоздыру») Қазақстанда тәуелсіз журналистер мен блогерлерге қысым көрсету құралына айналған. Ол бұл істерді марқұм Айдос Садықов пен Мұрат Нұртілеуге қатысты Orda.kz жасаған материалдармен байланыстырды.