Бүгін Қазақстанда депутаттарды сайлау қарсаңындағы тыныштық күні

Қазақстанда бүгін сайлауға қатысты барлық үгіт-насихат жұмыстары тоқтайтын – тыныштық күні.

Заңға сәйкес, сенбіде, 18 наурызда, ҚР Парламенті Мәжілісі мен мәслихаттар сайлауына қатысты  кез келген үгіт-насихатқа тыйым салынады.

Кандидаттар мен оның жақтастары, кез келген партия немесе өзін-өзі ұсынған кандидаттар болсын бұл күнді үнсіз өткізіп, барлық насихат жұмыстары мен жанамаларын тоқтатуы тиіс.

Бұл ережені бұзу ӘҚБтК-нің 102 және 120-баптары бойынша жауапкершілікке тартылады.

Еліміздегі сайлау учаскелері жергілікті уақыт бойынша 07:00-ден 20:00-ге дейін жұмыс істейді. 

Дауыс беруге 18 жасқа толған Қазақстан азаматтары қатыса алады. Сайлау тізімдеріне 12 миллионнан астам азамат кіреді.

Сайлауға келген еліміздің тұрғындарына  17 облыста түрлі түсті бес бюллетень ұсынылады.

Көк - партиялық тізімдер бойынша сайланатын Мәжіліс депутаттарының сайлауы бойынша;

Жасыл - бір мандатты аумақтық сайлау округтері бойынша сайланатын Парламент Мәжілісі депутаттарының сайлауы бойынша;

Күлгін - партиялық тізімдер бойынша сайланатын облыстардың, республикалық маңызы бар қалалардың және астананың мәслихаттары депутаттарының сайлауы бойынша; 

Қызғылт сары - бір мандатты аумақтық сайлау округтері бойынша сайланатын облыстардың, республикалық маңызы бар қалалардың және астананың мәслихаттары депутаттарының сайлауы бойынша; 

Сұр - бір мандатты аумақтық сайлау округтері бойынша сайланатын облыстық маңызы бар қалалар мен аудандар мәслихаттарының депутаттарын сайлау бойынша.

Өз кезегінде Астана, Алматы және Шымкент тұрғындары түрлі түсті төрт бюллетень алады: партиялық тізімдер бойынша Мәжіліс депутаттарын сайлау бойынша – көк, ал бір мандатты округтер бойынша – жасыл; қалалық мәслихатқа кандидаттарына дауыс беру бюллетеньдері күлгін және қызғылт сары түсті болады.

Барлық  бюллетеньде «барлығына қарсы» деген баған болады.

Сайлау учаскелеріндегі дауыстарды санау 19 наурызда жергілікті уақыт бойынша кешкі сағат 20:00-де басталады және 20 наурызда таңғы 8:00-де аяқталуы керек.

Еске салайық, Қазақстан Республикасы Парламенті Мәжілісі мен мәслихаттар депутаттарының кезектен тыс сайлауы 19 наурызда өтеді.