Боқаевтың жақтастары оған қатысты істі тікелей эфирде ашық түрде қарауды талап етті

Азаматтық белсенді Санжар Бокаевтың серіктестері, аса ірі мөлшерде қаржы жымқыру, жалған ақпарат тарату және Алматыдағы Баум тоғайында ағаштарды заңсыз кесуді ұйымдастыру күдігімен айыпталған Боқаевқа қатысты істі тікелей эфирде ашық түрде қарауды талап етті, деп хабарлайды  Orda.kz.       

Олар бұл істің саяси астары бар деп есептейді.

«Біз бұл істен саяси астарды көріп отырмыз. Барлық материалдар бізге қолжетімді емес, бірақ қолымыздағы деректерге сүйене отырып айтарымыз іс қолдан жасалған. Сондықтан митинг өткізуге өтініш берілді, бірақ рұқсат берілмеді. Сондай-ақ Санжарға қатысты сотты тікелей эфирде ашық өткізу туралы петиция модерацияда тұр», – деп түйіндеді «#НетУтильсбору» қозғалысының өкілі Владимир Ким. 

Бұл іс бойынша Боқаевтан бөлек, оның видеографы Ұлан Нүсіпқожа да екі айға қамауға алынған екен.  «#НетУтильсбору» қозғалысының тағы бір өкілі Берік Заиров мұны Боқаевқа қысым көрсету деп санайтынын айтты.

«Ұлан жалдамалы пәтерде тұрады, несиеге алынған көлікпен такси жүргізеді. Қамауға алынуына байланысты төлем жасай алмайды, бұл оның отбасына ауыртпалық түсіреді. Меніңше, осылайша Санжарға қысым жасалып жатыр», – деді ол. 

Еске салсақ, бүгін Санжар Боқаевтың бұлтартпау шарасымен екі айға қамауға алынғаны белгілі болды.

18 наурызда белсендінің қылмыстық іс аясында тергеу әрекеттері барысында ұсталған болатын. Тергеу мәліметінше, Боқаев «ағаштарды заңсыз кесуді және ұрлау ұйымдастырып, қаржыландырған» деген күдікке ілінген. Сондай-ақ оған аса ірі көлемде қаржы қаражатын алаяқтық жолмен жымқырды деген айып тағылған.

Оқи отырыңыз: 

• Санжар Боқаев бұлтартпау шарасымен екі айға қамалды
• Алматыда белсенді Санжар Боқаев ұсталды
• Алматыда заңгер Әділетхан Молдаханның ұсталғанын полиция растады