Алматыда белсенді Санжар Боқаев ұсталды

Бүгін Алматы қаласында қоғам белсендісі Санжар Боқаев ұсталды. Бұл туралы Orda.kz Қазақстан Республикасы Бас прокуратурасының баспасөз қызметіне сілтеп хабарлайды.

«Бүгін Алматы қаласында қылмыстық іс бойынша тергеу әрекеттерін жүргізу аясында Қазақстан Республикасы Қылмыстық-процестік кодексінің 128–131-баптарына сәйкес, Санжар Боқаев ұсталды. С. Боқаев әлеуметтік желілерде жалған ақпарат таратып, қоғамда теріс пікір қалыптастыру мақсатында кейбір тұлғалардың қоғамдық саябақ аумағында ағаштарды заңсыз кесуі және құрылыс нысандарынан мүлік ұрлауы туралы бейнематериалдарды жариялаған деген күдікке ілінді. Тергеу деректеріне сәйкес, Боқаев бұл қылмыстарды ұйымдастырып, қаржыландырған. Ол табысы төмен адамдарды осы іске тартып, оларға сыйақы беру арқылы ағаш кесу мен ұрлық жасауды тапсырған» деп жазылған таратылған хабарламада.

Қадағалау органының мәліметінше, ол «аса ірі көлемдегі қаражатты алаяқтық жолмен жымқырды» деген де күдікке ілінген.

«Қазақстан Республикасының Қылмыстық-процестік кодексінің 201-бабыне сәйкес өзге ақпарат жария етуге жатпайды»,  деп қосты Бас прокуратура. 

Еске салсақ, былтыр маусым айында Қазақстандық блогер әрі қоғам белсендісі Санжар Боқаев іздеу базасынан табылғаны белгілі болды. Алматы әуежайында полиция қызметкерлері оны ұстамақ болған. Боқаевқа полиция қызметкерлері оның аты-жөні іздеу базасына енгізілгенін айтқан. Дегенмен сол күні блогерді полицейлер босатқан болатын.

Тақырыпқа сай ұсынамыз:

• ІІМ Санжар Боқаевты экстремистер тізіміне қосты
• Қайта өңдеуге қарсы петицияны талқылау барысында шу шықты
• «Досаевтың кезінде де болған»: Алматыда бюджет ақшасына алған қыштарды неге жеке үйге тасыды?
• Үлкен Алматы өзеніндегі гранит тастарды заңсыз сатып жатқаны белгілі болды