Бір күнде 26 су басу жағдайы: Алматы әкімдігі жаңбыр салдарын жоюмен белсенді күресіп жатыр

Алматыдағы нөсер жаңбыр салдары жедел түрде жойылып жатыр. 4 шілде күні Алматыда бір тәулік ішінде 10 мм жауын-шашын болды. Нөсер жаңбыр найзағаймен бірге шамамен күндізгі сағат 14:00-де басталып, 17:00-ге дейін жалғасты, деп хабарлайды Orda.kz.

Ең қатты нөсер жауын 15:00 мен 16:00 аралығында жауып, осы уақытта 7 мм жауын-шашын түскен. Бұл туралы қалалық коммуналдық инфрақұрылым және тұрғын үй инспекциясы басқармасы мәлімдеді.

Қаланы су басу қаупіне жедел әрекет ету мақсатында коммуналдық қызметтер күшейтілген кезекшілік режиміне көшірілді.

Жұмыстарға 104 арнайы техника, 74 мотопомпа, 12 ассенизаторлық көлік, 75 жедел бригада (құрамында 425 жол жұмысшысы бар) қатыстырылды. Сонымен қатар 2,3 мың қап құм дайындалды. Қосымша түрде қалалық құтқару қызметі мен төтенше жағдайлар департаменті бөлімдері кезекшілік атқарды.

Бір күн ішінде қала аумағында барлығы 26 жерде жергілікті су басу жағдайы тіркелді. Сағат 20:00-дегі жағдай бойынша оның 24-і толық жойылып, қалған екі учаскеде жұмыстар жалғасуда.

Жалпы тәулік бойы көше-жол желілерін күтіп ұстауға 3 080 жол жұмысшысы мен 1 225 арнайы техника жұмылдырылды.

Синоптиктердің болжамынша, 5 және 6 шілде күндері Алматыда жауын-шашынсыз, құбылмалы бұлтты ауа райы күтіледі. Коммуналдық қызметтер қалыпты режимде жұмысын жалғастырып, ауа райы өзгерген жағдайда жедел әрекет етуге дайын.

Еске салсақ, премьер-министр Олжас Бектенов Алматыдағы сел қаупі, елдегі жауын-шашынға қатысты шұғыл кеңес өткізді.

Алматы, Жамбыл облыстарында және Жетісу өңірінде қатты жаңбыр жауады деп болжанып отыр. Үкімет басшысы жергілікті билікке эвакуация пункттерін дайындап, көлік құралдарын әзірлеп, төтенше жағдай туындаған жағдайда әрекет ету жоспарларын жаңартуды тапсырды.

«Қазгидромет» болжамына сәйкес, алдағы күндері республика аумағының басым бөлігінде жауын-шашын көп болады.

Оқи отырыңыз:

• Алматыдағы сел қаупі, елдегі жауын-шашын: Бектенов шұғыл кеңес өткізді
• Алматыдағы сел қаупі: Ақсай өзенінен 100 тонна қоқыс шығарылды
• Алматыда еріген қар суы сел болып ағып, көпірді жұлып, жолды шайып кетті