Билік Бішкек тұрғындарынан ШЫҰ саммиті кезінде «Ыстықкөлде демала тұруды» сұрады

30–31 тамыз және 1 қыркүйек күндері Бішкек қаласында Шанхай ынтымақтастық ұйымы саммиті және Дүниежүзілік көшпенділер ойындарының ашылу рәсімі өтеді. Көптеген жоғары мәртебелі қонақтардың келуі жоспарланғандықтан, қала көшелері жиі жабылады, деп хабарлайды Orda.kz. 

Осыған байланысты билік қала тұрғындарынан уақытша қаладан тыс жерде бола тұруды сұрады. Бұл өтінішті әлеуметтік желіде Қырғызстан президентінің баспасөз хатшысы Асқат Алагөзов жариялады. Оның айтуынша, елге алғаш рет бір мезетте 21 мемлекеттің басшылары келеді, кейбірі жұбайларымен бірге келмек екен.

«Осыған байланысты Бішкек тұрғындарына өтініш білдіреміз, мүмкіндігінше бұл күндерді Ыстықкөлде немесе басқа демалыс орындарында өткізіңіздер. Әйтпесе, ең алдымен өздеріңізге қолайсыздық туындайды, себебі үш күн бойы қаладағы жолдар жиі жабылып тұрады», — деді ол. 

Сонымен қатар, Бішкекте оқу жылының басталуы кейінге шегерілді, мектеп оқушылары мен студенттер сабаққа 15 қыркүйектен бастап кіріседі.

«Сондықтан 1 қыркүйекке дейін Бішкекке асығудың қажеті жоқ. Осыған байланысты демалыстарыңызды 15 қыркүйекке дейін алдын ала жоспарлай аласыздар», — деп түйіндеді баспасөз хатшысы. 

Айта кетейік, жоғары деңгейдегі қонақтардың келуіне байланысты Астана тұрғындары да жиі қозғалыс қиындықтарына тап болады. Мысалы, 2024 жылы Қазақстан астанасында Орталық Азия елдері басшыларының саммиті өткен кезде қалада ірі көлік кептелісі тіркелген болатын.

Оқи отырыңыз:

• Бірнеше күннен бері 40-тан астам шетелдік турист Қырғызстандағы таудан түсе алмай отыр, қазақстандықтар да бар
• Қырғызстан Қазақстаннан жанармай жеткізуге қолдау көрсетуді сұрады
• Қазақстан, Қырғызстан және Өзбекстан Бішкекте энергетикалық жүйе мәселелерін талқылады