Белгілі спортшының отбасында құлдықта болған Мұқанның ісі бойынша тың дерек шықты

Солтүстік Қазақстан облысындағы белгілі спортшының күйеуінің үстінен Мұқанды құлдықта ұстағаны үшін қылмыстық іс қозғалды. Мұқанның адвокаты Orda.kz редакциясына сұхбат берді.

Еске салар болсақ, Алматы облысының 23 жастағы тұрғыны Мұқан Негматов өз тағдырының қорқынышты беттерін аша отырып, танымал спортшының отбасында құлдықта болғанын мәлімдеді. Orda.kz редакциясына берген сұхбатында ол еркін күрестен Азия чемпионатының қола жүлдегері Айша Уәлишан мен оның күйеуі Әлфараби оны 10 айдан астам уақыт бойы қорқытып, еркінен тыс құлдықта ұстағанын айтты. 

Мұқанның адвокаты Ерасылдың айтуы бойынша қылмыстық іс ақпан айында тоқтатылған. Себебін — «қылмыс құрамының болмауы» деп айтқан.

«Мұқан өзі келген, еркін жүрген, ешқандай шектеулер болмаған деген қорытынды жасалды, Қылмыстық іс ақпан айында жабылып қалған, бірақ біз қайта шағым түсіреміз», — деді Мұқанның адвокаты Ерасыл Тұрсынбекұлы.

Ал Мұқанның ағасы Асқар оның қазір ем қабылдап жатқанын, әлі де тілінің күрмеліп жүргенін айтты. Мұқан 10 ай құлдықта болған кезде өте көп психологиялық жарақаттар алып, дұрыс сөйлей алмай қалған. 

Күдікті Мұқанның расында да өз үйінде он айдан астам тұрғанын мойындаған, бірақ бәрі ерікті түрде болған дейді. Ешкімнің ұрмағанын, күштеп ұстап отырмағанын, жұмысты да өз еркімен істегенін айтты.