Белгілі сценарист Нұрлан Санжар ауруханаға түсті

Белгілі жазушы, сценарист, Қазақстан халқының еңбек сіңірген қайраткері Нұрлан Санжар дәрігерлер «жазылмайтын» деп айтатын өкпе ауруына шалдыққан. Бүгін ол терапия алу үшін ауруханаға жатқызылды.

Orda.kz тілшісі Дидар Қайрат бұл туралы Facebook парақшасында хабарлады.

Ол қазақ руханиятына өлшеусіз үлес қосқан киносценарист, жазушы, философия ғылымдарының кандидаты. Қазір Нұрлан Санжар медициналық көмекке мұқтаж. Бүгін ол терапия алу үшін ауруханаға жатты.

Ол – Еуропадағы Lambert академиялық баспасынан алты ғылыми кітабы жарық көрген ғалым, «Жошы», «Бату», «Періште», «Қызыл қар» романдарының авторы. Бұған қоса, баспадан шықпаған тоғыз қолжазбасы бар. Киносценарист ретінде де ол қазақ кино өнеріне өзіндік қолтаңбасын қалдырды.

Жүздескенде Нұрлан Санжар отбасылық қиындықтары туралы да ашық айтқан еді. Оның ұлы мүгедек, ал жұбайы ауыр ота жасатқан.

Orda.kz бұған дейін жазушыдан сұхбат алған болатын.

Бүгін хабарласқанымызда жазушы ауруын жеңілдетіп, өмірін ұзартуға көмектесетін екі жол бар екенін айтты. Бірі – дің жасушаларын трансплантациялау, бірақ бұл бірнеше жылды қажет етеді. Оның үстіне, кейін қатерлі ісік қайта пайда болу қаупі жоғары. Екіншісі – Астанада трансплантация жасау, бірақ ол үшін қанша уақыт күту керектігі белгісіз. Донор табылмай қалса, бұл да өмірге қауіп төндіреді.

«Менің дәрігерім бұл мәселені зерттеп жатыр. Иә, енді ашық айтуға болады. Басты мақсатым – әйелім мен ұлым үшін тірі қалу. Жағдай өте ауыр. Созылмалы обструктивті өкпе ауруының (ХОБЛ) 4-ші сатысында өмір сүру ұзақтығы орта есеппен алғанда жарты жылдан бір жылға дейін ғана. Маған қоғам мен биліктің көмегі ауадай қажет», — деді Нұрлан Санжар.

Orda.kz редакциясы жазушының жағдайының жақсаруын және отбасына оралуын тілейді.